Laboy Sa Plaza, Farol Sa Pasko

Gulpi ang mabawi kontra sa sunod sunod na bagyo sa kabikolan, mabawi asin mag orogma sa panahon nin Pasko. Inot na mabawi iyo an mga negosyante na sagkod ngonian nag aagrangay pa sa kalugihan matapos na an saindang mga panienda paitomon sa laboy na dara ni Kristine, haros dai na puedeng ipanao an mga ukay ukay na anas kolor la’tom asin parong dalnak. Makulog sa bulsa an inabot kan mga bikolanong an saindang mga automatic na vehicolo pig lamos sa baha asin makantidad na marhay ang pag pa irahay. An mga banko nag aagrangay ta an saindang mga ATM machines dai mausar ta pig re-program kan laboy, dai nanggad puedeng hugas hugasan ta oras na ini pa andaron, makahadit ta baka an withdrawal na sanribo, magluwas sarong milyon, kaya an mga depositor nin banko nagbuelta sa banking system kan 70s na an pag withdraw ipinapaagi sa magagayon na kamot kan mga teller. Mga malabsay na menu sa perang mga karihan asin restaurant ta mayo nang mabakalan nin mga gulayon, freskong sira asin mga ingrediente ta interong linantop kan baha, mabawi sa paagi nin pagtienda nin masisiram na kakanon. Nagiromdoman ko kan mag abre an SM City, kadakol kaming nagpipila sa food court tanganing magkakan man lamang nin masiram ta sawa na kan sardinas sa harong, sabi kan tindera sa sarong sikat na kakanan sa Food Court, solamente an panienda ninda Maloto asin Kusidong Buraw, mayo kan pig mamalaking halo-halo, duman sa saro pang restaurant na sikat sa native, mayong ibang tinda kundi maloto asin gulay na langka. An grabe duman sa sarong tindahan na pig hanapan ko nin letson, negatibo ta an solamenteng tinda mga pinatos na sarsa, mas marhay pa an mantika o kiniskis na sangkaka na ihalo sa maloto. Si Mayor dapat magbawi, ta sa panahon na lamo lamo an mga kalye dahil sa laboy, asin mabatang basura, haros pa sana poros lamoda an namumutahi sa tambak na nguso. Puwes, kadakol an nagsasabi, na oras na maibuelta sa makintab na kalinigan an saindang mga centro asin plaza, an dapat nindang gibohon iyo na sorpresahon an saindang mga konstituentes sa paagi nin espesyal na Christmas Project, asin ini an aapodon, “ Paskohan ni Alkalde”. Kahawig sa famosong Christmas Market duman sa nasyon kan Austria na kada Deciembre, pig dadayo nin mga turista tanganing mag shopping, magkakan asin mamasyar sa tambak na farol asin Christmas lights. Kaya mga LGU sa mga lugar na pinakanos ni Kristine, uya na an dapat nindong gibohon, sa kada pag bagunas nin uram, sighidan tolos an saindong plaza tanganing mahali an laboy asin alikabok asin maging maayahay na istambayan an Plaza tanganing magayon pag tiendahan nin Mani, bulastog, isaw, balut, asin hotdog. Papurulion muna asin pakarigoson an mga makuapo nin Rizal na dai pa nanggad nagpupundo ta sige an pambiktima nin mga nakakalingaw na mga driver, kargador asin iba pang propesyon. Arogon nindo an kagayonan kaidto kan University of Nueva Caceres na kun panahon nin Pasko, namulaag nin mga Christmas lights an campus asin igua nin mga Christmas Foods , tunay na maogma. Guibohon an saindong Plaza nin mahamot, mayong alikabok, may mga dekolor na farol asin kadakol nin mga mababakal na kakanon tanganong an mga familya diyan magtiripon tanganing mag pa picture. Kita naman, mag abang na sa pag abot kan malipot na doros Amihan tanganing sabaton an satuyang pasko na maogma asin wala -too an Christmas Party.