Lagonoy iguang bagong mercado publico

Ni Sonny Malate

Lagonoy, Camarines Sur --- Dakulaon an kaogmahan ni alkalde Dyego Luiz H. Pilapil na pakalihis nin labing diez años, magkakaigua na nin  sarong bago, moderno asin magayon na mercado publico an saiyang banwa.

Gikan  an  P50M na fundo para sa first phase kan estructura sa oficina ni Cong. Arnie B. Fuentebella. An patrabaho kaini madurar nin 217ng aldaw. Ini namumugtak harani sa lumang saodan sa barangay San Rafael  na nadestroso kan kasulo pirang taon na an nakaagi. 

Naglalaom an huben na alkalde na an bagong saodan  maresulta sa sarong mabaskog na economia, saro sa mga prioridad niyang programa para sa  Lagonoy na ngonian saro nang 1st class municipality.

Durante  sa groundbreaking ceremony kan nakaaging semana para sa proyecto, nagtaong aseguracion an huben na alcalde na ini saiyang ipapahaman sa pagtatarabangan asin suporta kan gobyerno asin mga namamanwaan. 

Nanotaran ni Pilapil na an Lagonoy may dakulang potential na maging  centro kan comercio asin  dae na madepende pagsaod asin negocio sa banwaan nin Goa.  Sa arog kaining paagi, magantad an economia, kabuhayan, agricultura asin turismo digdi. 

Sa ginibong groundbreaking,  presente si Alkalde Jovi B. Fuentebella kan Sagñay,  nagrepresentar ki Cong. Arnie B. Fuentebella. Binanggit niya an maliwanag na paglaom para sa Lagonoy na maging centro kan progreso sa cuatro distrito. 

Yaon man an mga miembros kan Sangguniang Bayan sa liderato ni Bise Alkalde Jerry Jake R. Remoto, an duwang dating alkalde, Delfin Jr. asin JB Pilapil, DPWH Engr. David Balingbing III, department heads, line agency representatives, barangay officials asin stakeholders.

Si Bise Alkalde Remoto an nakiulay ki Alkalde Fuentebella na padagdagan sa congresista nin panibabong alocasyon an proyecto. An alcalde listo man an simbag na ini ipapaabot niya sa tugang na congressman kaya posibleng maialocar liwat an kaparehong  cantidad sa orug na madaling panahon.

Naobserbaran ni Remoto na an pagkakaigua nin saodan sa Lagonoy may daradarang pagkasararo, paglaom asin oportunidad.   Segun sa saiya, ini dakulang inspirasyon asin orgulyo para sa mga residentes digdi.

Sa lado man ni dating alkalde JB Pilapil, nagiromdoman niya an  kulog boot asin agyat sa mga experienciang inagihan asin namatean niya sa kamot kan mga nasa ibong na lado kan  politica na nag-ulang para marealizar an bagong saodan.  

Naoogma an dating alkalde na an pigmaigotan niyang pighagad ki Cong. Fuentebella na fundo para digdi pig-aprobaran sa huring termino niya asin iiimplementar sa laog kan enot na sanggatos na aldaw sa puwesto kan huben na Pilapil..

Sa katarakod na bareta, an kataid na banwaan na Goa asin San Jose an nag-aasikaso naman na makahimo kan  saindang bagong saodan.

An gobyerno local kan Goa, sa paagi ni alkaldesa Raquel S. Lim, an nagkakalap nin panibagong fundo para sa bagong mercado publico. Ini an magiging karibay sa fundong nakonsiger para sa kaparehong proyecto kan dating administrasyon. 

Sa San Jose, si Alkalde Jerold B. Peña  may kaulay na man na pribadong investor para sa sarong saodan sa irarom kan Public Private Partnership.

Propuestong itutukdo na bagong mercado publico sa Lagonoy, Camarines Sur alagad piglinaw kan LGU na bakong bongalong harong. (Retrato: LGU Lagonoy)