Lagonoy magkakaiguang bagong evacuation center

Ni Sonny Malate

LAGONOY, Camarines Sur --- Magkakaiguang bagong evacuation center an banwaan nin Lagonoy, Camarines Sur. An fundo kaini naconrsegir kan local government unit (LGU) sa liderato ni Alkalde Dyego Luiz H. Pilapil sa Department of the Interior and Local Government (DILG).

Segun ki Atty. Brix  A. Pasiona,  Municipal Disaster Risk Reduction Management Officer/Municipal Administrator,  an initial na fundo nasa P25M. Kun magkulang,  ini dudugangan  kan alocasyon gikan sa LGU.

An evacuation center na  may duwang eskalon namumugtak harani sa edificio mismo kan MDRRMO asin Bureau of Fire Protection (BFP) sa barangay San Vicente. An pagconstruir kaini mapoon sa bulan na Septiembre ngonian na yaon.

Dagdag pa kan DRRM Officer an facilidad inaapod na "Smart Evacuation Center" kun saen an LGU pinabuwelo kan DILG kan sadiring disenyo kaini basta magcomple sa mga specificasyon para digdi.

An evacuation center igua kan mga kinakaipohan na facilidad para sa mga ocupantes kun may calamidad. Siring man, ini mahiwas, conveniente asin segurado an kapalibotan. Ini may standby generator set asin estable an supply kan tubig.

Naoogma asin orgulyo ni Pasiona na sa bilog na probinsya an Lagonoy an pinakaenot na banwaan na nagkaiguang alocasyon hale sa DILG para sa evacuation center.

Maroromdoman na kan mga nakaagin g taon an nagigin pailihan kan mga apektadong residentes durante sa panahon nin  calamidad iyo an escuelahan, barangay hall, day care center, simbahan asin pribadong mga residencia.

Mientrastanto, segun sa pamayo kan MDRRMO  an saindang oficina preparado sa pagsimbag sa mga trabahong saindang  sinumpaan. Pigtawan niyang doon an importancia kan pagcomplemento kan kakayahan kan personahes asin kaipong mga equipajes.

Manonotaran na durante sa panahon kan calamidad dakula asin mahiwas an papel kan MDRRMO sa incident management team. Ini nagpoon pa kan panahon kan Covid. 

Katakod kaini, pigbuyagyag niya na an saindang mga personahes nasa 41 gabos. Sinda an may sustenidong programa sa skills training bilog na taon. Manonotaran na afuera sa kapatagan, an Lagonoy iguang dagat, salog asin kabukidan na dakula an agyat sa pagresponde kun may calamidad.

Naoogma si Pasiona na an personahes niya permanenteng nakadesignar sa saindang oficina kaya facil an pagsustenir kan saindang kakayahan sa pagresponde durante sa calamidad,  aksidente, pagtransportar nin pasyente asin ibang pangaipo sa comunidad.

Pig-apreciar man niya an higot na suporta ni Alkalde Pilapil para madagdagan an mga equipajes ninda. Sa presente, may apat na ambulancia, boom truck na nasusubli sa General Services Office, mga fiber glass na banca, rubber boat asin iba pang gamit sa eficiente asin marikas na pagresponde.

An MDRRMO mantenido an pakikipagtabangan sa ibang mga oficina sa pagserbi sa comunidad sa panahon nin kadeficilan. Kairiba digdi an PNP, BFP, DSWD/MSWDO, Philippine Army, DILG asin DepEd.

Dagdag pa digdi an mga Barangay Officials, Simbahan, Business Sector, Radio groups asin ibang force multiplier na sararo sa pagresponde kan pangangaipo kan comunidad.