Lagonoy North Peñafrancia Regatta mabusol kan cultura, turismo

Ni Sonny Malate

Lagonoy, Camarines Sur --- Nagpaabot nin imbitasyon si Alkalde Dyego Luiz H. Pilapil para sa paaboton na celebrasyon kan Lagonoy North Peñafrancia Regatta. Susog sa Alkalde, ini mas macolor, magayon, makahulogan asin piglalaoman na mabusol cultura asin turismo digdi.

Sa Partido Area, an celebrasyon saro sa pinakadakula asin haloy nang pagrukyaw sa  kafiestahan kan Patrona kan Bicol, Nstra. Señora Virgen de Peñafrancia. Ini ginigibo sarong semanang enot sa Peñafrancia Festival sa ciudad kan Naga.

Ngonian na 2025, ika-29ng taon na  kan Lagonoy North Peñafrancia Regatta,  asin enot sa termino ni Alkalde Pilapil.  Ini nakacentro sa norteng coastal area kan banwa.  An regatta namundag sa initiativa kan Iglesia Filipina Independiente.

Segun ki Ariel O. Nitullano, designadong Municipal Tourism Officer, an local na gobyerno bastante an preparasyon sa mga actividad na piglatag Septiembre 10-12.  Dagdag pa niya, si Alkalde Pilapil grabe an entusiasmo mantang primero ini sa saiyang termino.

An simbahan kan Romana  Catolica  sa irarom ni Most Rev. Rex Andrew Clement Alarcon, DD asin Rt. Rev. Arnold M. Damayan kan Iglesia Filipina Independiente  magkakaiguang separadong celebratory mass asin iba pang actividad religioso.

An pigdadagsa na Maritime Procession sa lado kan Simbahan Catolica tampok sa Septiembre 10, mantang an Fluvial Procession kan Iglesia Filipina Independiente sa Septiembre 12. Arog kan dati, ini piglalaoman na macolor, maogma asin solemne.

Mientrastanto, apwera sa actividad religioso,  may mga nakalinyadang  sports events,  arog kan 1st Mayor Dyego Pilapil 10 ball billiard tournament,  Boxing sa Dagat asin iba pa na pigmamanehar taun-taon ni Jonathan Bacares kan LGU Lagonoy.

Magkakaigua man kan bibong motorboat race, 2-men saka 2-women sibid competition, 10- men casco competition asin shore casting fishing tournament. Dakol pang mga maogma asin macolor na actividades an paparticiparan kan residentes sa sampolong costales na barangay sa Lagonoy North.

Pipilion man an Bb. Lagonoy North Peñafrancia Regatta, siring man an maconsuelong  Miss Gay Lagonoy North Regatta na dinadagsa nin dakol na paradalan.

Gigibohon pa man an mobile registration para sa mga Persons with Disability (PWD) asin pre-birth registration asin distribusyon kan birth certificate tanganing maparani an servicio kan local na gobyerno sa barangay.

An pagparambong kan local na turismo saro sa priority program ni Alkalde Pilapil. Pighihiling niya na an regatta sarong paagi na maitampok an mga magagayon na lugar asin cultura sa norteng coastal kan Lagonoy sa mga bisita asin turista na nagdadayo digdi.

Dagdag pa kaini iyo an famosong Samhod Festival sa Centro na taun taon pigdadagsa kan katawohan. Yaon man an bukid kan Genorangan na haros bilog na taon pigdadayo huli sa pambihirang tatanawon asin managom na kakanon  digdi. 

An Lagonoy biniyayaan nin mga makawiliwiling kabukidan, salog, waterfalls, baybayon saka kadagatan. 

Apwera kaini, makukua digdi an mga local na producto asin  kakanon na tatak Lagonoy - naiiba, de calidad asin dakulang  orgulyo kan banwaan.

Sa liderato ni alkalde Pilapil, an turismo asin cultura sa Lagonoy piglalaoman na padagos  na marambong asin magiging contribuente sa pag-uswag kan comunidad.

Maritime Procession ki Ina sa Lagonoy North Peñafrancia Regatta. (Photo LGU Lagonoy)