Lagonoy North Peñafrancia Regatta tolong decada na ngonian
LAGONOY, CAMARINES SUR --- Sa laog nin 30ng taon nagin parte na kan cultura, pagtubod, turismo asin economia an celebrasyon kan Lagonoy North Peñafrancia Regatta para sa mga Lagonoyon asin dayo digdi.
An macolor, bibo asin makahulogan na actividad tampok an sakay sa salog (fluvial) saka dagat (maritime) ki Nstra. Señora de Peñafrancia asin Divino Rostro. Dagdag gayon asin kaogmahan iyo an mga kakarabit na actividades sibika, pakawat asin pangkabuhayan.
Centro kan celebrasyon an barangay Balaton kun saen namumugtak an simbahan kan duwang mayor na relihiyon kan banwa, Romano Catolico asin Iglesia Filipina Indipendiente o Aglipay. Patrona kan Parroquia kan Catolico si Nstra. Sra. Virgen de Peñafrancia
Susog ki Ariel O..Nitullano, Municipal Tourism Officer designate, an regatta sa norteng Lagonoy pig-initiar kan Aglipay kan 1996 bilang sarong local na solemneng celebrasyon para ki Ina, an Patrona kan Kabikolan.
Bilang pakisumaro sa religiosong actividad, pinagmarhay kan gobyerno local kaito sa liderato ni dating Alkalde asin Bokal Ferdinand (Mamo) B. Melgarejo asin Parroquia kan Nstra. Sra. de Peñafrancia sa Balaton na magdayon sa celebrasyon.
Ini nagresulta sa unidad kan gobyerno local, simbahan, oficiales de barangay, escuelahan asin privadong sector sa taonan na pagrokyaw asin pasasalamat ki Ina. Sa laog kan tolong decada, an celebrasyon uminagi sa limang ehecutivo local sa Lagonoy. An pinakahuri an presenteng Alkalde, Dyego Luiz H.Pilapil.
Ngonian na ika-30ng taon kan regatta an celebrasyon nakatalaan sa Septembre 9 hasta 11. An maritime procession kan Romano Catolico gigibohon sa Septembre 9. An mayor na celebranfte sa Banal na Misa si Most Rev. Jose Rojas, Jr, DD kan Diocese kan Libmanan.
An fluvial procession man kan simbahan kan Aglipay nakatalaan sa petsa 11. An mayor na celebrante si Rt. Rev. Arnold M. Damayan, Bishop kan Diocese kan Maquebaca.
An linyada kan mga maogmang actividades iyo an pagkorona kan Bb. Lagonoy North Peñafrancia Regatta 2026, Boxing sa Dagat, 2-Men/Women Sibid Competition, Motorboat Race, 10-Men Casco Race asin Laro ng Lahi.
Dagdag pa an volleyball tournament, inter-barangay basketball tournament, zumba kairiba sa Civil Service Month celebration, amateur singing contest, parada kan LGU/Barangay officials asin fireworks display.
Pighihiling ni Nitullano na an rinibong devotos ni Ina na nagdadagsa sa taonan na celebrasyon orug pang madugang kun mahaman na an circumferential road na nagcoconectar kan mga coastal barangay sa Lagonoy North asin banwaan kan Garchitorena.sa mainland kan Partido Area.
Mientrastanto, pigbuyagyag ni Alkalde Pilapil na may mga bagong nadiskubreng pambihirang puting baybayon, waterfalls asin birhen na kadlagan sa Lagonoy North. Siya naglalaom na dagdag ining lugar na dadayohon kan mga turista sa saiyang banwaan.
An pagparambong kan turismo saro sa prioridad na programa kan alkalde para sa dagos na progreso kan Lagonoy, saro sa limang 1st class municipality sa Partido Area.
Comments