LCE hagad an padagos na suporta kan mga namamanwaan

Ni Sonny Malate

Lagonoy, Camarines Sur --- Sa pagrukyaw kan primerong sanggatos na aldaw bilang hefe  ehecutibo, nagpasalamat asin naghagad kan padagos na suporta kan mga kahimanwa si Alkalde Dyego Luiz H. Pilapil. 

Particular na pinasalamatan kan Alkalde an  Sangguniag Bayan sa pamamayo ni Bise Alkalde Jerry Jake Remoto, mga personahes kan gobyerno local, oficiales kan Barangay, mga Lagonoyon asin Stakeholders.

Sa mga nahaman na asin padagos na ginigibong mga proyecto sa periodong ini, pigbanggit kan huben na alkalde na an pinuonan nang pagconstruir kan mercado publico iyo an urog na naaapreciar asin pighahalat na macompleto kan mga Lagonoyon.

An estruktura may initial na fundong P50M gikan sa oficina ni Cong. Arnie B. Fuentebella. Nasa first phase  pa sana ini asin an alkalde naglalaom na sa mga dugang na alocasyon, sa masunod na taon ini macocompleto na  asin mabusol kan economia local.

Apwera kan mercado publico, dakol pang mga nacompleto asin ibang ginigibo pa sa lado nin Infrastructura, Salud, Social Services, Agricultura, Sports Development asin Emergency Response.

Dagdag pa digdi iyo an Sports Development, Youth Development, Peace and Order, Employment Services, Livelihood Program asin Tax Collection Efficiency Campaign.

Sa mga proyecto asin programang kabarale digdi, apwera kan mercado publico, significante iyo an Super Health Center sa barangay Himanag, Municipal Birthing Center asin  Animal Bite Center. An duwang huring facilidad nagduduhol nin libreng serbisyo sa mga Lagonoyon.

Dugang pa digdi iyo an pagduhol  nin  Php100,O00. asin Php10,000. cash gift sa sarong centenarian, pag-activar kan Public Safety Office asin agresibong campanya sa revenue generation tanganing masusteniran an pagiging 1st class municipality kan banwa.

Sa lado kan mga kapareho niyang huben, pigcrear man an Local Youth Development Council asin napaacredit an pitong youth organization sa National Youth Commission. Sustenido man an pagpapusog sa sports development sa paagi nin mga sports tournament.

An iba pang mga nahaman na asin on-going projects gabos beneficiado an pangangaipo kan comunidad sa patinampo, drainage, street lights, health care asin mga basic services. 

Manonotaran man  na an linyada kan mga acomplisimiento ni Pilapil pagrerealizar kan pigbubusol niyang progreso kan saiyang banwaan.

Ini nakapalaman sa mga priority programs niyang  Economic, Infrastructure and  Sports Development, Health and Social Services, Tourism, Agriculture, Livelihood, Disaster Preparedness asin Peace and Order.

Sarong lider na may malinaw asin positibong pananaw sa paggogovernar, pighihiling kan Alkalde na an saiyang banwa iguang dakulang potential na maging sarong ciudad. Ini deficil alagad bakong impossible, dagdag niya. 

An alkalde may estadong "observer member" sa Mayors for Good Governance (M4GG). Pakatapaos kan inaagihan na proceso, siya naglalaom na finalmente siya  magiging full fledged member.

Pigtawan doon ni Pilapil na an mga naginibohan na asin ginigibo sa presente kapinonan pa sana kan pag-iribahan entre sa saiya asin mga Kahimanwa pasiring sa kauswagan.