Legacia ni dipuntong Alcalde Pan padagos na nagdadanay

Ni Sonny Malate

GOA, Camarines Sur --- Sarong taon  pakatalikod  sa kinaban ni Alkalde Marcel S. Pan, an saiyang mga legacia sa marhay na paggogovernar an padagos na piggigiromdom asin pig-aapreciar kan mga namamanwaan, asin padagos na nagdadanay.   

An memoria  asin inspirasyon na iwinalat kan Alkalde bilang sarong marhay na  servidor an orug pang nabubusol huli sa pigtugdas na  Mayor Marcel S. Pan Foundation. Ini namundag kan Mayo 14, 2025, an primerong compleaño kan Alkalde matapos na siya  bawian nin buhay kan Septembre 13, 2024 sa edad na 63 huli sa kahelangan.

Segun sa viuda kan Alkalde,  Konsehal Ruby P. Pan, an pambihirang iwinalat na legacia kan saiyang esposo nakapalaman sa concepto kan saiyang  programang  Trekking to Unlock Community Ailments and Difficulties (TUCAD) na naging ganador sa Galing Pook Award.

An programa nag serbing dalan tanganing madaling maparani an mga servicio kan local na gobyerno sa mga barangay. Nagtao man ini nin oportunidad asin  poder sa mga residentes na makahaman nin mga desisyon saka plano asin maiimplementar  sa pinagsararong esfuerzos asin recursos kan iba-ibang sector.

Orug sa gabos, namate kan mga taga barangay na an gobyerno may pagmakulog  sa saindang kapakanan sa paagi kan nobleng katohoyohan kan TUCAD.

Segun ki Konsehal Pan, obheto kan foundation na orug pang papusogon an mga legacia kan defuntong alkalde sa lado nin good governance, pagbusol kan capacidad kan huben na mga lideres asin pagsustenir kan mga programa para sa edukasyon, kapalibotan, pamilya, kaakian asin kababaehan, 

Siring man, mawot kan Foundation na marecunosir asin  mapagantad an capacidad  kan barangay, escuelahan asin ibang sector para sa karahayan kan comunidad. Particular na susuportahan iyo an mga individual na may bokasyon sa pagpadi.

Pigbuyagyag ni Pan na plano pa kan Foundation na magpublicar nin libro dapit ki Alkalde Pan sa paagi ni Dr. Danilo M. Gerona. Sa paagi kaini siya naglalaom na magiging dakulang inspirasyon sa kadaklan  an buhay asin agi-agi  kan saiyang esposo bilang sarong servidor kan banwaan.

Si Pan an halawig na taon naging Alkalde asin nagserbi bilang  Board Member para sa Partido Area. Siya saro man na actibong civic leader, sports enthusiast, entrepreneur asin dayupot sa simbahan. Dati siyang seminarista asin gikan sa reliyosong pamilya na iguang duwang padi.

An paternal grandfather kan Alkalde,  si Laureano Pan, an naging Alkalde man kan Goa.  Sarong kalye na sakop kan barangay Bagumbayan Pequeño asin Matacla, an L. Pan,  ipinangaran sa saiya.

Manonotaran na mismong sa pamilya ni Alkalde Pan yaon sinda Konsehal. Pan asin Bise Alkalde Marcel Michael P. Pan na padagos na nagtatangkuros asin nagsasabuhay  kan mga calidad kan defuntong alkalde bilang de calibreng lider.  Sinda dakulang contribuente sa pagpadanay kan marhay na pangaran kan Alkalde.

Si Bise Alkalde Pan an nakatolong termino bilang miembro kan Sangguniang Bayan antes naging bise alkalde. Pighihiling kan kadaklan na pirang taon pa magiging saro man siyang local chief executive arog kan saiyang ama.

Mientrastanto, an dating simpleng primera dama na si Konsehal Pan an luway luway naman na  nagpapahiling kan sadiring imahe bilang sarong lider na may dedikasyon asin pagmakulog sa lado nin edukasyon, cultura, salud asin interes kan pamilya, kaakian asin kababaehan. 

Sa Septiembre 13, primerong death anniversary ni Alkalde Pan magkakaiguang sarong banal na misa  bilang pagrespeto, saludar asin  comemorar kan saiyang memoria bilang marhay na ama kan banwa.