Legacion vs Bongat vs Mendoza sa Naga?

Maski bako nang Bicol regional center kan gobyerno nasyonal ngonyan pero an Naga iyo man giraray an puso kan Kabikolan ta an kinamumugtakan kaini sa mapa kan rehiyon iyo an parteng daghan kan ronang Kabikolan.

Saka sa estorya kan nasyon na dai pwedeng ribayan poon 500 na taon na an naka-agui kan mag-abot si Magellan, an Naga na pig-ngaranan kadtong Nueva Caceres iyo an ikatolo sa mayor na ciudades kan nasyon sunod sa Cebu asin Manila.

An Diocesis kan Caceres na naka-centro sa Naga dakulaon na marhay ta an sakop kaini poon Samar abot Tayabas. Yaon pa digdi sa Caceres namumugtak an Patrona o Ina kan Kabikolan na si Nuestra Senyora de Penafrancia na an pista pig-cecelebrar kun bulan na Setyembre asin pigdadalaw nin milyones na debotos bako lang hali sa ibang parte kan Pilipinas kundi hali pa sa ibang nasyones kan kinaban.

An Naga iyo pa an centro kan negosyo sa Bikol sagkod ngonyan ta yaraon digdi an darakulang banko asin komersyo asin an Camarines Sur na kinamumugtakan kan Naga iyo an pinaka-dakulang provincia kan rehiyon, an Naga iyo man an pinaka-dakulang ciudad.

An populasyon kan Naga, Camarines Sur asin provincia kan Camarines Norte kun sasararoon haros parareho lang kan populasyon kan Sorsogon, Masbate, Catanduanes asin Albay patin kan mga ciudades kan Legazpi, Tabaco, Ligao, Sorsogon asin Masbate.

Kan 1976 panahon kan martial law napiritan si Presidente Marcos na idakit an regional center hali sa Naga pasiring Legazpi ta pigsururog-surugan siya kan mga war lords kadto kan Albay, Catanduanes, Masbate asin Sorsogon.

Si Gobernor Felix Fuentebella na iyo an lider kan Kilusan ng Bagong Lipunan(KBL) asin si Alkalde Vicente P. Sibulo kan Naga asin si Mayor Melchor Villanueva kan Iriga City mayong naginibo kundi itogot an kahurutan ni Marcos.

Nagkariribok kadto ta rinibong empleyados/empleyadas kan gobyerno an pigbaralyo an opisina sa Legazpi pati an saindang mga pamilya. Palibhasa martial law dai sinda maka-kontra. Poon kadto sagkod ngonyan Legazpi City na an regional center kan Bikol.

Pero maski siring Naga, Camarines Sur man giraray an pinaka-matao, centro kan komersyo, centro kan relihiyon asin centro kan mass media.

An Naga nakaproducir nin Raul Roco, Jess Robredo asin Leni Robredo alagad an Albay pighahalat pa na magdakula man an estratura sa nasyon ni Congressman Joey Salceda.

Sa lado nin politika, an mga lideres sa Albay garo nag-oorolay-olay sana sinda Salceda, Al Francis Bichara asin Edcel Lagman.

Sa Sorsogon dating kontrolado kan mga Lee asin Frivaldo ngonyan naibuelta na sa mga Escudero.

Sa Masbate dati mga Espinosa an hadi ngonyan may mga dugong Tsino na an nagrereynar sa politika duman.

Sa Catanduanes man lobog na an mga Alberto niribayan na an liderato kan mga negosyante asin may dugong dayuhan.

Sa Camarines Norte naribayan na ni Gobernor Tallado asin Tagalog speaking politikos sinda Pimentel, Typoco, Padilla, Vinzons asin iba pa.

Digdi sa Camarines Sur, Naga asin Iriga nagbago an timpla kan politika poon paka-Edsa revolution kan mag-abot na si Luis Robredo Villafuerte Sr. asin Jesse M. Robredo maski ngani an mga kingpins sa lambang distrito yaraon pa halimbawa an mga Alfelor sa Rinconada, Fuentebella sa Partido, asin Andaya sa primer distrito pero lalong nakagamot an pamilya ni LRV ta an saiyang aki na si LRay asin maku-apo na si Migs nasa poder pa asin tibaad saro pang maku-apo niya an magtukaw sa Kapitolyo sa 2022.

Si Gobernor Migs na nakatolong touno na o siyam na taon sa pwesto bilang gobernador madalagan na sa Rinconada para congressman sangli sa mag-agom na Fortuno. An tugang na nguhod ni Migs na si Luigi na aki ni Lray iyo na man an malaban para bagong gobernador.

Sa ibong na lado, nagsararo nang pwersa sinda Andaya, Alfelor, Fuentebella asin si Dato Arroyo tanganing patumbahon an pusog na liderato o dinastiya kan mga Vilafuerte sa pinaka-dakulang provincia kan Bikol.

Pano na palan an Naga? Iyan an hapot.

Naglilibot-libot na si encumbent Mayor Nelson Legacion. Aram niya pati an posibleng kalaban niya na si ex-Mayor John Bongat asin an mayamanon, puderoso asin dukot sa mga Robredo na si Tato Mendoza.

Si Bongat may programa na pati sa radyo asin nagtatao nang serbisyong legal sa mga pobreng kleyente, an saiyang esposa na si Farah, dating first lady naglilibot naman asin si Tato Mendoza bukas an M Plaza asin mantinido an saiyang organisasyon political asin pigpapadakula pa an saiyang grupo.

Igwa pa man ibang may aspirasyon arog kan grupo ni Luis Ortega pero mayong pwersa asin mayong kwarta. An sainda lang na ambisyon tapuson na an “Ubos kun ubos, Gabos kun gabos” sa politika sa Naga.

Sa ngonyan malinaw an kaabtan kan politika sa Albay asin pagtaraid na lugar pero sa Cam Sur, Naga asin Irriga malabo pa.

Kun ano an dadalaganan asin kun sain ni VP Leni Robredo iyo an madikta kan kumpas kan politika sa Camarines Sur.

Mag-gobernador daw si Leni? Gusto kan grupo na Andaya pero habo ni LRay asin kan mga Villafuerte.

Magdagos daw maka-presidente si VP Leni? An simbag nasa kamot kan ISambayan ni justice Carpio, ni Manny Paquiao, ni Ping Lacson asin ni Isko Moreno.