Legislative agenda ibubusol ni VM Ayu Pan

Ni Sonny Malate

GOA, Camerines Sur --- Pursigido si Bise Alkalde  Marcel Michael (Ayu) P. Pan na ibusol an saiyang legislative agenda sa ika-29ng Sangguniang Bayan (SB) digdi. Enot nang pigbuyagyag sa inaugural session, ini nakapalaman sa acronym kan saiyang pangaran.

An kamawotan kan bise alkalde gikan sa agyat asin inspirasyon na maging sarong efectibong servidor  tanganing maitulod asin masusteniran an totoong espiritu kan good governance sa banwaan kan Goa. Si Pan an naging Municipal Councilor nin tolong termino antes na naeleher bilang bise alkalde.

Pinakaenot iyo an MITIGATION  o pagbawas kan pag-abuso kan kapalibotan, criminalidad asin kapagtiosan sa comunidad o poverty alleviation.

Sunod iyo an INFRASTRUCTURE sa paagi kan pagpahiwas asin dagdag kan mga infra projects asin pagpreservar kan dati nang existidong proyectos orug na itong nasa irarom kan Build, Build, Build Program. Segun sa huben na bise alkalde, mas kaipohan an mga infra projects mantang saro nang 1st class na banwa an Goa.

COMMERCE and Industry,  sa paagi kan sustenidong sistema asin policia tanganing mamantenir an estado kan Goa bilang centro kan negosyo asin progreso sa Partido Area. An Goa may potential na maging pinakaenot na ciudad sa Partido Area.

Sa lado kan HEALTH o salud, maninigong ipadagos asin mas papusogon an Infirmary, Super Health Center, mga Rural Health Units asin  an hospital para sa kapakanan kan mga namamanwaan. 

Pighuhurot man ni Pan an kauswagan kan AGRICULTURE bago an industrialisasyon mantang an Goa sarong agricultural community. Kaipohan man na maseguro an food security, dagdag kan bise alkalde.

Sa lado kan EDUCATION  asin ECONOMIC ENTERPRISE, segun ki Pan, ipapadagos asin sususteniran an Goa Community College (GCC) asin Goa Skills Training Center na maresulta sa academic asin skills/ technical training orug na kan mga hubenes.

Sa presente, an GCC iguang bagong edificio na pigpapatugdok sa barangay Tagongtong, gikan sa fundo sa oficina ni Cong. Arnie B. Fuentebella. Pigmimidbid bilang ama kan colegio iyo si defuntong alkalde Marcel S. Pan.

Tatawan man nin atencion an LOCAL TOURISM na dakulang contribuente sa kauswagan. Papakusogon man an espiritu nin entrepreneurship sa paagi kan Entrepreneurial Summit. Kairiba pa man an pag-actibar kan local economic enterprise.

Mientrastanto, liwat na pigbanggit kan bise alkalde na an Sangguniang Bayan suportado asin makikipagtabangan sa oficina ni Alkaldesa Raquel $. Lim sa mga proyektos, initiativa asin advocacia para sa ikakarahay kan banwa.

Sa presente, particular na pighahalat kan mga namamanwaan iyo an finalmenteng pagiging operational kan district hospital harani sa Goa Integrated Central Terminal. Siring man, an pagkakaiguang bago asin modernong mercado publico karibay kan nasulong saodan digdi.

Si Pan an nagbuyagyag man na ipapahaman ninda an legislative building na enot nang pinoonan kan nakaaging administrasyon.Piglalaoman na ini maresulta sa pagkakaigua nin mahiwas asin buwelong espasyo para sa mga oficiales, personahes asin mga Goaeño.