Legislative franchise kan Casureco I, aprubado na sa komite sa senado

Dawa igua pang nagprubar nin politico sa Camarines Sur na ulangon na ma-isyuhan nin 25 taon na legislative franchise an Camarines Sur I Electric Cooperative (Casureco I), alagad etsafuera na inaprubaran na kan Senate Committee on Public Services kan Septiembre 3, 2026.

Sinda Board President Concordio LL Romano asin General Manager Edna Valerio na presente sa committee hearing sa senado nagpahayag na pinangenotan ni Senador Raffy Tulfo na pamayo kan sinambit na komite nganing aprubaran na an legislative franchise.

An House Bill 9005 na naghahagad nin renewal kan franquicia kan Casureco Uno alagad kasabay sa naaprubaran sa Komite ni Tulfo iyo an onseng cooperativa nin electricidad asin an apat digdi hale sa Bicol.

Kumpleto an documentos kan Casureco Uno nganing deretso nang dai maabala sa komite sa senado na nagpasalamat man an mga opisyales kan cooperativa ki Senador Tulfo mantang si Representante Nelson Legacion kan tercer distrito kan Camarines Sur iyo an nagpadreno sa Camara-Baja.

An cooperative sampolong taon nang Triple A poon kan panahon ni General Manager Anna Sylvia Alsisto asin ngunian ni GM Valerio na duwang taon na sa pwesto.

Sinabi ni Romano na an Casureco Uno nakatalaan nang magpasaso an saindang franquicia sa Deciembre 2028 alagad pigtutubodan ninda na dai nang kaulangan nganing makalusot na sa ipapaapod na bicameral hearing sa senado.

An cooperativa sakop an sampolong mga banwaan sa segundo asin premir distrito kan Camarines Sur mientrs iguang 108,000 na miembros-consumedores base sa listahan kan Deciembre 2025.

Sa mga cooperativa nin electricidad sa Bicol, unikong tolong escalon na edificio kan Casureco Uno na namumugtak sa Libmanan, Camarines Sur. Narealisar an edificio sa panahon ni GM Anna Sylvia Alsisto.