Leni Na!

Labing sarong taon na lang mapili naman kita kan masunod na Presidente kan Pilipinas susog sa 1987 Cory Constitution. Enero na kita ngonyan na bagong taon 2021.

Sa Mayo 2022 presidential election na.

Matalikod na si Presidente Digong Duterte riribayan na nin bago. Petsa uno pa lang kan Enero 2021 nagruruluwas na sa mainstream asin social media an mga pangaran kan mga makarandidato na maguin pamayo kan nasyon sa 2022.

Digdi sa Bicol sa mga provincias kan Cam. Sur, Albay, Cam. Norte, Sorsogon, Catanduanes asin Masbate saka sa mga ciudades kan Naga, Iriga, Legazpi, Sorsogon, Masbate asin Tabaco, nasisiguro ko na an pambato kan Kabikolan asin kan Liberal Party na si Vice-President Leni Gerona Robredo iyo an magana.

Bako lang ta siya na an Vice Presidente asin manok kan oposisyon kundi bilang Bikolana, taga-Naga, esposa kadtong depuntong Mayor asin DILG Secreatary Jessie M. Robredo, an ina taga-Canaman Camarines Sur, an ama haling Bulan, Sorsogon, asin nakalibot na sya sa enterong Pilipinas bilang VP kundi siya talaga an paborito kan haros gabos na Bikolano. (apuera ki Atty. Sal Panilo) ta an mga Bikolnon halop nang marhay na magka-igwa man nin sadering Presidente kan nasyon.

Tibaad lamang daa maibalik an Philippine National Railways asin maka-abot na sa Naga an South Luzon Expressway asin magka-igwa na nin dakol na pabrika digdi tanganing makatao nin hanapbuhay sa mga Bikolano na dai na magparaduruman pa sa Manila sa paghanap nin trabaho.

Pangaturogan pa kan mga Bikolnon na magka-igwa nin Bikolanong Presidente kan magka-igwa nin juven na lider sa U.P. kaidto kan dekada 30 sa persona ni Winceslao Q. Vinzons kan Indan, Camarines Norte, pamayo kan Young Philippines Party.

Naguin presidente kan UP Student Council asin editor-in-chief kan Philippine Collegian, official publication kan State University, pinaka-juven na delegado sa 1935 Constitutional Convention, naguin congressman asin gobernador kan provincial nin Camarines Norte. Alagad kan tiempo Hapon pinamayuhan niya an mga guerilya laban sa Hapon kaya siya asin an saiyang esposa ginadan kan mga enemigos na maski sagkod ngonyan dai pa nakukua an saindang mga restos.

Luminaban siya maski ki Presidente Quezon kan panahon, kaalyado niya an juven man na si Arturo Tolentino na nagraaho na magka-igwa nin alyansa an Malayan people arog kan Pilipinas, Malaya asin Indonesia. Brown kontra sa mga puti, Independiente sa Amerika.

An saindang kurahaw Malaya Iredenta! sinda ni Tolentino an mga lideres kan Young Philippines Party kundi amay na pinutol an saiyang karera sa politika kan huli kan giyera mundial numero 2.

Sunod na pinangiturugan kan mga Bikolano na magdakula sa politika nasyonal, maguin Vice-Presidente ngona asin maguin presidente kan nasyon si Dominador “Bading”Aytona kan Albay, na nag-eskwela sa Camarines National High School sa Naga. Naguin CPA, lawyer, naguin Department of Finance Secreatary asin naguin Senador. Alagad natahuban an saiyang karera sa gobyerno kan panahon nin Martial Law.

Nagkaigwa ngani nin halipot na panahon na an mga taga-Naga asin taga-Camarines Sur nagtutulod kuta sa juven na Bankero asin technocrat na si Luis R. Villafuerte na makatungtong sa Malacaṅang. Pero kan pinapakandidato siyang senador kan 1988 sa lindong kan partido ni Cory, nagsayuma siya asin itinao an puesto ki Victor Ziga.

Habo niyang bayaan an Bikol bilang como-gobernador kan pinakadakulang provincia kan rehiyon kaya habo niyang mag-senador.

The rest is history.

Si Senador Raul S. Roco, arog ki Villfuerte taga-Naga man, outstanding congressman, outstanding senator, hinog nang maguin presidente alagad amay na nagadan.

Ngonyan si VP Leni abot kaya na an langit, ga-papel na an Malacaṅang.

Ano pa an hahanapon ta, di si Leni na?

Kun ganahon pati ni Leni an masunod na presidential election, siya an primerong abogada na makakasakat sa Malacaṅang.

Maboot, magayon, mahigos (siya lang siguro an politiko na naka-abot pati sa tuktok kan bukid Isarog sa pagkampanya asin pag-abrasa, pagkugos asin paki-ulay sa mga taong saradit ta mga hararayong banwaan maski siya taga-ciudad asin esposa nin sarong dating city mayor asin cabinet member.

Pagnapalaban si VP Leni dai man siya pababayaan kan saiyang ninong asin godfather na si Louie Robredo Villafuerte.

Si LRV man pati an responsable sa pagpatukaw kan saiyang esposo bilang director kan Bicol River Basin Development Program asin pagpakandidato para alkalde asin pagpagana ni Jess Robredo sa Naga City.

Si LRV pa ngani an responsable sa pag-nombra bilang Judge ki Tony Gerona na ama ni Leni asin iyo pa an ninong kan sinda ikasal ni JMR sa Manila Cathedral kan 1987 katumpal si depuntong congressman Bonifacio Gillego, kababayan asin paryente ni Judge Gerona.

Maski kaalyado kan mga Villafuerte si President Duterte asin kan saiyang pamilya, pero imposibleng ilaglag si Leni sa Camarines Sur o sa enterong Kabikolan. Maski kaalyado na ngonyan kan mga Villafuerte si Presidente Duterte, imposibleng ipadaog si Leni kan mga Bikolano.

An mga Bikolnon bistadong “clanish” o burugkos pag-abot sa vida politika.

Nagaka-igwa na nin Marcos, Quirino, Magsaysay asin Ramos na mga Ilokano,nagka-igwa na nin Cory asin Noynoy Aquino saka Gloria Macapagal Arroyo haling Centra Luzon, Erap Estrada haling Metro Manila, Manuel Roxas asin Carlos Garcia haling Kabisayaan asin ngonyan Digong Duterte haling Mindanao.

Dapat may Bikolano naman. Kun bako ngonyan nuarin pa? Kun bako si Leni siisay?

Kundi an hapot sa luwas kan Bikol kumusta daw an ganahan ni Leni?

An simbag yaon sa kamot kan gabos na Bikolano na maghigos, maggastos asin magtabang paglibot sa manlaen-laen na Islas kan Pilipinas tangarig ganahon kan Bikolana an lutsadang ini.