Leyenda De Batalay

KAIDTONG PANAHON, TAON 1576, an Galleon del Espiritu Santo na may lunad na mga kastilang misyonaryo inabot nin sarong makusog na bagyo. Nadisgrasya asin nalubog ini sa sarong lugar na inaapod na Nagnagngangang Buwaya Point. Ining lugar na ini nasa may parteng sur asin sinang kan Catanduanes.

Siring sa mga punto sa kadagatan bantog na makusog pirmi an agos digdi. Delinkwenteng lugar ini sa mga barko. Inapod man ining Nagnagngangang Buwaya Point ta kun ma tanaw mo ini hali sa harayong lugar an porma niya garo sarong buwayang naka nganga.

Segun sa sarong istorya, naka langoy o inanod pasiring sa pangpang si pamayo kan mga missionaryo na si Prayle Diego de Herrera. Kabali man sa mga naka salvar si siyam na padi na kairiba niya.

Pero kan pinunan ni Prayle Herrera an saindang misyon sa paagi nin pag laag nin krus kun sain sinda inanod, inatake sinda kan mga katutubong tribu duman asin ginadan sinda gabos.

An resulta sa pangyayaring ining pag gadan sa mga banal na tawo, inatake si mga katutubo duman nin mga surod o malasugi (swordfish). Kadaklan kan mga taga duman nagka garadan sa pag atake kan mga sirang ini. Garo an nangyari, kinastigo si mga pagano na katutubo duman.

Nangyari ini sa sarong lugar duman sa Bato, Catanduanes na inaapod na Batalay na hali daa sa ngaran kan sarong sira duman.

Mga pirang dekada na ako huring naka duman sa Batalay. May kapilya duman asin may halangkaw na krus sa lugar kun sain ginadan asin linubong si Prayle Herrera.

AN SABI MAN SA IBANG ISTORYA, si Prayle Herrera lang daa an napadpad sa Batalay asin may mga barangay na daa duman kaidto na pinapamayuhan nin sarong pagano na Hepe o Datu. Pero si Prayle Herrera daa, sa Batalay, an nag poon kan Kristyanismo sa Catanduanes.

Sarong aldaw tinabangan daa ni Prayle Herrera mag aki si bados na agom kan Hepe kan mga pagano pero aksidenteng nagadan daa ini sa pag pa-ngaki. Sa kaangutan kan si Hepe, nagpa kalot daa si Hepe nin sarong hararom na balon asin duman pina laag si Prayle Herrera nganing magadan.

Pagka tapos magadan si Prayle Herrera inatake ining lugar na ini nin mga sira na inaapod na batalay o swordfish. Kadaklan kan mga tawo duman ginadan kan mga sira na ini.

Sa duwang bersyon na ini pareho an istorya kan pag kastigo sa mga nag gadan ki Prayle Herrera.

Sa presenteng mga aldaw na ini may pig tugdok nang Batalay Holy Cross Diocesan Shrine sa Batalay, Bato, Catanduanes. Memoryal ini para kay Prayle Herrera.

Saro ini sa mga lugar duman sa maogmang isla kan Catanduanes na pig dadayo kan mga turista asin mga deboto.

May mga rason kun tano ta nagsurat ako manungod sa Prayleng ini:

Primero, arog kan bago tang santo papa Leo XIV, saro man na miembro kan congregasyon ni San Agustin si Prayle Herrera. Pareho sinda nagin misyonario kan OSA (Order of Saint Augustine).

Ika duwa, natubod ako na sarong martir si Prayle Herrera asin dapat magin sarong opisyal na santo kan simbahan Kotolika. An istorya manungod sa mga nangyaring kastigo sa mga nag gadan ki Prayle Herrera garo mga milagro.

Ika tolo, si Prayle Herrera an saro kan mga pinaka enot na padi na nag pundar kan pinaka lumang monasteryong simbahan sa Pilipinas – San Agustin Church sa Intramuros. Saro man siya kan mga pinaka enot na misyonaryong nag abot sa Pilipinas.

Gabos totoo ining tolo. Pero totoo daw idtong parte kan istorya kan mga sira (swordfish) na nag atake sa mga nag gadan ki Prayle Diego de Herrera? Ano tabi sa pag mati nindo?

Leyenda lang ini o totoo?