LGBTQA+ Community bida sa Pintakasi

Ni Sonny Malate

Goa, Camarines Sur --- Dakulaon na kaogmahan, orgulyo asin  onra an namatean kan mga miembros kan LGBTQA+ community kan banwaan na ini nin huli sa itinaong importansya asin pag-apreciar sa sainda kan local government unit digdi.

Sa paagi ni Alkalde Marcel S. Pan, Bise Alkalde Alfredo P. Gonzaga III asin Sangguniang Bayan, an grupo kan LGBTQA+ digdi tinawan nin mahiwas na participasyon sa celebrasyon kan taonan na kafiestahan sa Junio 23-24, bilang pagtaong onra ki San Juan Bautista, an Santo Patron.

An mga actividades katakod kan pintakasi nakalinyada magpoon Junio 17 hasta Junio 25.

Naoogma si Mark Anthony Ariola, pamayo kan Federation of LGBTQA+ and Allies of Goa (FLAG), na sa primera vez sa Partido Area, may sarong local government unit na hustong  nag-aapreciar kan mga marhay na naginibohan asin dakulang contribusyon ninda sa comunidad. 

An bulan na Junio inaapod na Pride Month kan comunidad kan Lesbian, Gay, Bisexual, Transgender, Queer asin Allies o iba pang gender (LGBTQA+). An rainbow o bolangiw iyo an simbolo kan grupong ini.

Sa presente, an FLAG iguang 114 miembros. An katampad kaining grupo sa bilog na Partido Area na BOLANGIWOG (Bolangiw, Burunyog, Balangibog) sa pamamayo kan bistadong vlogger na  si David Con Monserate Rivero compuesto man nin 424 miembros. An grupong ini katabang kan FLAG sa pag-asikaso kan mga actividades katakod kan fiesta sa Goa.

An mga actividades na pigtutuwangan  kan duwang grupo iyo an traditional na  bridal hair and make up, Queen Gay Goa, Partido Gay Majorette Competition, Float Competition asin an Mardi Gras Competition. An mga events na ini, apwera kan bridal hair and make up, paparticiparan kan mga LGBTQA+ sa bilog na Partido Area.

Sinabi ni Ariola na an events ninda magigin  BONGGACIOUS (bongga) asin SHALA (sosyal). Mismo!

Maserbing kick off event sa Junio 17 kan taonan na fiesta iyo an BIDA (Buhay Ingatan, Droga Ayawan) Fun Run, Color Fun Run,  na papamahalaan kan Goa Municipal Police Station sa pamamayo ni PMaj Rodolfo Z. Borromeo, Chief of Police. Coordinator iyo man si PSSG Richard P. Capuz.

LGBTQA+ community sa Partido Area orgulyong pigwawagayway an banderetas na bolangiw,  simbolo kan grupo ninda ngonian na Pride Month. (BOLANGIWOG)

An Goa Negosyo Center sa paagi ni Business Counselor Rhea De Alday  magkakaigua man nin Goa Artisans Trade Fair, Junio 17-25, sa atubangan kan Goa Sports Complex.

Segun ki De Alday,  mababakal digdi an mga local  na handicrafts, iba pang magagayon na producto asin pagkakan. Magkakaigua man nin mga local na musikero para sa kalingaan kan mga parabakal asin mga nagpapasyar sa trade fair. 

Mientrastanto, sinabi ni Sheila Orlina Belleza, Municipal Tourism Officeŕ, na yaon man giraray an CAT/MAPEH Parade competition, Civic Parade asin an Barangay Beautification Contest sa sampolong barangay sa poblacion.

An Goa pigcoconsiderar na pinakaprogresibong banwaan sa Partido Area. Kan bulan na Abril pigcelebrar an ika-216 na foundation anniverary kaini bilang sarong banwa.

An local na gobyerno sa pamamayo ni Alkalde Pan recepiente nin manlaenlaen na pang nacion na award hale sa man-iba-ibang award-giving bodies kan mga tuminalikod na taon. 

Sa presente, an local na gobyerno naglalaom na masungkit an Saringaya Award hale sa Department of Environment and Natural Resources (DENR), an pinakahalangkaw na pagreconusir kan pambihirang naginibohan na advocacia dapit sa pangataman kan kapalibotan.