LGU andam sa calamidad na posibleng magtama sa localidad

Ni Sonny Malate

Goa, Camarines Sur --- Preparado an local government unit (LGU) sa mga calamidad na posibleng mag-abot ngonian na papatapos an taon.

Ini an asegurasyon na binutasan ni Vincent Albert Garchitorena,  Municipal Disaster Risk Reduction Management Officer (MDRRMO) kan banwaan nin  Goa, Camarines Sur. 

Susog ki Garchitorena, an saindang oficina sustenido sa pagconducir nin mga training/seminar sa mga barangay dapit sa pag-andam sa bagyo asin ibang calamidad. Pigtatawan nin doon iyo an mga pasistema orug na sa panahon nin emergencia.

Kasabay kan training sa comunidad iyo man an pagtaong dagdag kaaraman mismong sa mga personahes kan MDRRMO tanganing madugangan an saindang capabilidad sa mobilization, rescue, relief operation asin ibang aspeto sa  saindang trabaho.

Ini ginigibo sa higot na coordinasyon sa oficina ni Alkaldesa Raquel S. Lim, Municipal Social Welfare Development Office (MSWDO),  Philippine National  Red Cross asin oficiales sa barangay.

Kairiba pa man sa mga katuwang kan MDRRMO an PNP,  BFP, Casureco IV, CENRO, DPWH asin  volunteer groups sa pag-utob kan saindang trabaho para sa kaligtasan kan comunidad.

Segun sa MDRRMO Officer,  kan mga nakaaging semana naging sibot  sinda  sa declogging kan mga baradong canal asin pagtabas kan mga sanga kan kahoy orug na sa may gilid kan tinampo. 

Sa presente, an MDRRMO Goa iguang duwang rescue vehicle, duwang ambulancia asin sarong water tanker. Sa orug na madaling panahon, posibleng magkaigua na nin boom truck para sa esfuerzos ninda sa disaster intervention asin mitigation. 

Sa lado nin evacuation center,  an LGU iguang arog kaining facilidad hale sa Philippine Amusement and Gaming Corporation (PAGCOR). Dagdag kaini iyo an mga barangay hall asin escuelahan na ginigibong pailihan kun may bagyo.

Dagdag pa kan  MDRRM Officer, an saindang oficina iguang total na 35 personahes huli sa dagdag na empleados na itinao sa sainda ni Alcaldesa Lim. Huli kaini nagkakaigua sindang duwang team kun may mga calamidad.

Nangapodan si Garchitorena sa namamanwaan na sa panahon nin calamidad, ugalion na mag-antabay sa mga media outlet para sa mga significanteng impormasyon. 

An MDRRMO Goa iguang hotline number,  Facebook page asin account na madaling maaccess o contact orug na sa oras nin emergencia. Igua pa man ini nin linya nin comunikasyon sa mga barangay para sa marikas na pariribayan nin impormasyon.

Nagpasalamat pa man siya nin huli ta dae rinadas kan uminaging Bagyong Opong an banwaan kan Goa asin pagtaraid na localidad kaya mayong nadanyaran na buhay, pananom asin mga pagrurugaring.

Personahes kan MDRRMO. Goa sibot sa paghale kan kahoy sa tinampo (Photo MDRRMO Goa)