LGU Goa finalist sa 2022 Galing Pook Awards

By Sonny Malate


GOA, Camarines Sur--- Hale sa total na 196 na mga LGU sa bilog na nacion   na nagmamawot na makabale sa sampolong ganador sa prestigiosong  Galing Pook Awards, nakalaog an local na govierno kan banwaan nin Goa, Camarines Sur sa 18 mga finalist kaini.


An entry kan banwaan na ini iyo an Trekking to Unlock Community Ailments and Difficulties (TUCAD) na pinapusog kan Municipal Ordinance No. 178, series of 2020.


Objeto kan programang ini na  hale sa initiativa ni Alkalde Marcel S. Pan iyo an mapaharani an mga pangenot na servicios kan local na govierno sa mga namamanwaan sa hararayong barangay orug na an mga kinapobrehan. Mawot kan activong servidor na mamatean kan mga nag-eerok sa pwerang lugar na an local na govierno nagmamakulog sa kamugtakan ninda.


Nin huli sa regular na pagsungko asin ginibong intervention ni Alkalde Pan, mga oficiales asin empleados kan LGU asin mga volunter groups sa mismong localidad  nasimbagan an pangangaipo sa salud, edukasyon, kabuhayan, infrastructura, kapalibotan asin iba pang mga aspeto sa pagbuhay sa localidad na dating dae natawan nin maninigong  atencion kan mga nakaaging taon.


Dae nagin kaulangan an distancia asin kadeficilan sa transportation papunta sa mismong barangay. Sa motivacion asin tamang paggiya ni Pan, mga miembros kan Sangguniang Bayan asin ibang stakeholders nagin activong kapartner an mga residentes kan govierno sa pagdecision dapit sa solusyon sa mga problema sa barangay.

TUCAD an panlaban kan LGU sa 2022 Galing Pook Awards competition


Sa paagi kan TUCAD, kadakol na mga tikapong residentes an nabiyayaan nin tabang hale sa DepEd, DOH, DSWD, DA, DENR asin iba pang ahencias asin mga non government organization na nagmamalasakit sa kapakanan ninda. An mga kageanan sa pagbuhay arog kan pagharong, kuryente, tubig asin ibang pangngaipo naitao sa mga barangay tanganing maiangat an saindang pagbuhay.


Sa maabot na Noviembre  21 gigibohon an panel interview asin presentation para sa 2022 Galing Pook Awards.  Sa sunod na aldaw o Noviembre 22, nakatalaan man an awarding ceremony sa sampolong  Galing Pook Awardees.


Si DILG Secretary Benhur Abalos iyo an magigin Chairman kan  Board of Judges. An mga miembros gikan sa iba-ibang sector kan comunidad.


An local na govierno kan Goa tolong veces  nang nakaguno kan taonan na Galing Pook Awards. Ini gabos durante sa termino ni Pan na an mga advocacia dakolang  orgulyo asin inspiration kan mga namamanwaan kan banwaan na ini.