LGU lugi sa Mandanas ruling, sabi

Lupi, Camarines Sur --- Naglangkaw an National Tax Allotment (NTA) dating internal revenue allotment (IRA) alagad lugi man giraray an sarong lokal na gobierno orog na kun nasa 3rd asin 4th class municipality.

Aprubado na kan Noviembre 22, 2021 sa 2nd reading sa Sanggunian Bayan kan LGU Lupi an saindang Php198 milyon annual budget para sa 2022 na magkakaigwa nin dugang na Php63 milyon sa NTA huli kan Mandanas ruling kan Corte Suprema alagad an dugang na fondo madalagan sa madi-devolved na mga ahencia nasyonal.

Si Consejal Noel Agravante, Vice Chairman kan Committee on Finance and Appropriation kan sanggunian nagpahayag ini an naheheling nindang mga opisyales lokal na posibeng abunado pa sinda.

Sa devolution an mga ahencia nasyonal arog kan Department of Agriculture, National Irrigation Administration, Department of Environment and Natural Resources, asin iba pang ahencia ibabalyo na sa sainda an ibang mga punksyon kaayon an fondo.

Kinakaipuhan mag-crear sinda nin dugang na mga posisyon alagad an sueldo asin iba pang operational expenses kan ahencia maghahale sa dugang na NTA, sabi pa ni Agravante.

Iyo man ini an mangyayari sa iba pang mga 3rd asin 4th class municipalities sa iimplementar na Mandanas ruling.

Sa mga seminar sa mga opisyales lokal kan Department of Interior and Local Government saindang pigpapaliwanag na dapat andaman na kan mga LGUs an pag-devolved kan ibang mga ahencia nasyonal sa masunod na taon mantang magkakaigwa na nin dugang na 37.89 por ciento marerecibing NTA hale sa gobierno nasyonal.

Naglangkaw an NTA mantang base sa Mandanas ruling an heras sa mga buwis sa LGU dapat bako lang hale sa Bureau of Internal Revenue envez igwa pang maghahale sa nakukulektang buwis nasyonal.

Kasunod man kan Mandanas ruling, si Presidente Rodrigo Duterte nagpaluwas nin executive order 138 sa implementasyon sa pagbalyo kan mga gagastoson na fondo sa mga proyecto sa infrastraktura, agricultura, social welfare, health care asin livelihood. (dpa)