LGU Lupi, CS tapos na sa DTP kan DILG

An opisyales lokal asin barangay sa banwaan na ini sa premir distrito kan provincia nakatapos na kan saindang duwang aldaw na Devolution Transition Planning (DTP) kan enot na semana ngunian na bulan.

Si Consejal Noel Agravante, Chairman kan Committee on Rules kan Sangguniang Bayan nagpahayag na an DTP seminar/planning pigkunducir kan Municipal Officer kan Department of Interior and Local Government sa pamamayo ni Ivy Leonardo alagad an enot na batch na ginibo kan Septiembre 1-2 sa Session Hall kan SB iyo an mga opisyales asin department head kan LGU asin sunod na semana si mga opisyales de barangay kan 38 barangay kan Lupi sa pamamayo ni Liga President Fernando Bustillos.

An planning bilang pag-andam kan lokal na gobierno asin barangay sa nakatalaan na pag-devolved kan mga ahencia nasyonal sa barangay ibababa sa LGUs asin dugang na marerecibing National Tax Allotment (NTA) na dating inaapod na Internal Revenue Allotment (IRA), sabi pa ni Agravante.

Ini kasunod man kan iimplementar na Mandanas-Garcia ruling na dapat bako lang an kaherasan sa buwis na nakokolecta hale sa Bureau of Internal Revenue (BIR) an dapat narerecibe kan LGUs sa IRA envez kabale na si koleksyon sa buwis hale sa national taxes. Huli kaini, malangkaw na sa 37.89 por ciento an dapat marecibing NTA na epektivo na nurong taon 2022.

Kabale sa saindang ginibong DTP iyo an implementasyon kan mga programa hale sa ahencia nasyonal asin ini kinababalehan kan Health, Infrastructure, social service, environment, health care, livelihood asin iba pa.

Naenot kaini sa entrevista kan Bicol Mail ki Camarines Sur DILG Provincial Director Melody Relucio saindang pig-eenganyar an mga LGUs na magbilog nin devolution transition team nganing saindang maandaman an dugang na mga punksyon base sa seksyon 17 kan RA 7160 o an Local Government Code mantang igwang pinaluwas na guidelines hale sa DBM asin DILG nganing igwa sindang basehan sa paghaman kan devolution transition plan.

Si Presidente Rodrigo Duterte nagpaluwas na nin Executive Order 138 sa iimplememtar pag-devolved kan mga ahencia nasyonal.

Kabale sa mga ipapasa irarum sa devolution iyo an Department of Social Welfare and Development, Department of Agriculture, Department of Public Works and Highways, Department of Environment and Natural Resources, National Irrigation Administration asin Department of Education. (DPAureus)