LGU nag-ambag P7 sa NFA buying price sa paroy

An lokal na gobierno sa Ciudad nin Sorsogon nag-alokar nin P7.00/kilogram bilang ambag sa P30/kg na National Food Authority buying price sa paroy kan mga paraoma nganing ilangkaw na sa P37/kg.

Alagad sa Camarines Sur na ‘‘rice granary’’ sa Bicol sa ngunian nagdadalagan na sana sa P20/kg sa pribadong kumprador mantang sa NFA sagcod sana sa P30/kg.

Dakulang bentaje sa paraoma na rehistrado sa Registry System for Basic Sectors in Agriculture (RSBSA) kun sinda mapatungod nin paroy sa NFA huli ta nagbabarato an presyo sa mga pribadong kumprador orog na ngunian na aranihan.

Sinda Alcalde Ester Hamor kan Ciudad nin Sorsogon asin NFA Bicol Regional Manager Julie Llenaresas nagpirmahan sa memorandum of agreement nganing ilangkaw sa P37/kg kan NFA buying price mantang an P7.00kg hale sa alokasyon kan LGU.

An subsidiya kan LGU kasunod kan implementasyon kan Palay Marketing Assistance Program for Legislators Local Government Units (PALLGU) siring kan pinapasunod sa ibang provincia alagad an LGU sa Ciudad nin Sorsogon iyo an may pinakalangkaw na subsidiya sa palay procurement program kan NFA.

Bako sanang naging paborable sa paraoma envez sa NFA nganing maenganyar sa paraoma sainda na magpatungod kan bagong aning paroy mantang sa pribadong kumprador naghuros na si cada kilo. Sa lado kan ahencia makakatabang nganing igwang bastanteng butter stock nin bagas.

Kabale sa nag-iimplementar na kan PALLGU iyo an mga LGUs kan Camarines Norte, Albay, Barcelona asin Del Pilar kan provincia nin Sorsogon, Malinao, Albay asin provincia nin Albay.

An iba pang mga provincial government sa Bicol pinadarahan na nin propuesto kan NFA alagad mayong mga kasimbagan.