LGU Naga mabakal bakuna vs Covid-19 sa AstraZeneca

Dai na naghalat an City Hall sa gobierno nasyonal sa suplay kan bakuna laban sa Coronavirus disease (Covid- 19) envez nagpaluwas na nin alokasyon na P50 milyon nganing magbakal bakuna hale sa AstraZeneca alagad posibleng punan sa ika-tolo o ika-apat na cuarto ngunian na 2021 hasta sa 2022.


Sa inaprubaran na P1.4 bilyon na 2021 annual budget kan lokal na gobierno kan Ciudad nin Naga maabot sana sa diez milyon pesos an pigtagama sa Covid-19, alagad nagsarimot nin dugang na fondo an Budget Office nganing makatipon nin P50-M.

PRESS CONFERENCE. Si Alcalde Nelson Legacion (naka-tindog) kan Ciudad nin Naga nagpapaliwanag kan nakatalaan na pagbakal kan City Hall kan bakuna hale sa AstraZeneca, sa likod nakatukaw sinda City Health Officer Dr. Butch Borja asin Consejal Sonny Ranola. (DPA)



Sa press conference ni Alcalde Nelson Legacion kaibanan sinda Consejal Sonny Rañola, Chairman kan Committee on Health sa Sangguniang Panlungsod asin City Health Officer Dr. Vito ‘‘Butch’’ Borja saiyang pinahayag na ‘‘Ubos kun Ubos, Gabos kun Gabos’’ na Nagueños an nakatalaan pabakunahan sa oras na mag-abot na an bakuna hale sa AstraZeneca.


Libre an bakuna alagad dai pipiriton an arin man na residentes na masayuma magpabakuna laban sa virus.


Tatawan nin prioridad iyo an mga frontliners, health workers, asin an gabos na an edad kabale sa populasyon kan mga dakul na nagpositivo sa virus o si mga binawian nin buhay nganing makontrolan an pagparalangkaw kan caso.


Sa datus kan ciudad si mga nagpositivo na nag-eedad nin treinta anyos pataas iyo an dakul an mga nagkagaradan. Huli kaini, sinda kabale sa 37 por ciento kan 224,668 populasyon kan Naga o 83,000 kabale sa maeenot na mapabakuhan.


An desisyon kan City Hall bakalon an suplay kan bakuna kan AstraZeneca huli kan minasunod na dahilan, ‘‘availability, price asin efficacy’’.


Alagad mantang yaon sa obligasyon kan gobierno nasyonal an pagbakal nin bakuna, naglalaom an City Hall na masuplay man giraray nin bakuna an DOH.


Sinabi kan jefe ejecutivo saindang pigconsiderar an AstraZeneca huli ta barato an presyo cantidad P610 asin halangkaw an efficacy sa 90 por ciento.


An mga lokal na gobierno sa Metro Manila asin iba pang ciudades kaparejo kan Ciudad nin Naga napili an sinambit na pharmaceutical company.


An ibang mga bakuna arog kan Pfizer an presyo kaini nagcacantidad nin P2,970 na may 95 por ciento an efficacy; Moderna – P3,904 na may 90 por ciento efficacy; Sinovac – P3,600; asin iba pang mga companya halangkaw man an presyo. (DPAureus)