LGU nakaguno kan 2025 Gawad KALASAG Seal of Excellence

Ni Sonny Malate

Liwat na na nakaguno kan Gawad Kalamidad at Sakuna Labanan, Sariling Galing ang Kaligtasan (KALASAG) Seal of Excellence an local government unit (LGU) kan banwaan nin San Jose, Camarines Sur. Kan taon na 2024, naging recipiente man ini kan prestigiosong onra.

An Gawad KALASAG taun taon na pigduduhol kan National Disaster Risk Reduction and  Management Council  (NDRRMC) sa mga Local Disaster Risk Reduction and Management  Councils and Offices (LDRRMCOs) sa bilog na nacion.

Objeto kan pag-extendir kan award tanganing mareconusir an esfuerzos na naginibohan kan mga individual, grupo asin LGU  sa pagpautob kan mga sistemang piglatag kan gobyerno para sa disaster risk reduction and management, humanitarian assistance asin climate change adaptation.

Pigtawan nin credito asin pasasalamat ni Engr. Gabriel C. Obias, Municipal Disaster Risk Reduction and Management  Officer, an dakulang suporta sa saindang oficina an LGU San Jose sa liderato ni Alkalde Jerold B. Peña,  na naging dalan sa pakaguno kan nabanggit na award sa duwang magkasunod na taon.

Segun ki Obias, an NDRRMC naglatag nin mga criteria na binabasehan sa paggawgaw kan award. Ini higot na pig-eevaluar tanganing madeterminaran an numerical rating para sa mga LGU na awardee. An awarding ceremony gigibohon sa Deciembre 5, 2025 sa ciudad nin Legaspi.

Manonotaran na apwera sa Gawad KALASAG, an LGU San Jose nakaguno pa man nin iba-ibang onra katakod sa good governance asin best practices sa liderato ni Alkalde Peña na sarong miembro kan Mayors for Good Governance (M4GG).

Sa presente,  an LDRRMO San Jose may duwang ambulancia, sarong pick-up vehicle asin duwang sasakyan pantubig. May manibigo  man na permanenteng  personahes asin mga job order staff tanganing mataparan an tamang numero nin staff complement.

Apwera kaini, may acreditadong  civil society organizations, volunteer radio group asin mga force multiplier,  sector kan negosyo, religioso, academe, oficiales de barangay,  hubenes asin iba pa sa comunidad na dakulaon na tabang sa panahon nin calamidad. 

Yaon man an suporta kan PNP, BFP, Philippine Coast Guard asin Tourist Police na parating katuwang kan LDRRMO bako sanang sa panahon nin calamidad kundi  sa iba pang kasiribotan sa localidad.

Susog sa LDRRMO, durante kan pag-radas ni ST Uwan, marikas na naglatag nin limang darakulang evacuation center an LGU,  apwera pa sa mga barangay hall, escuelahan asin privadong residencia na naging pailihan kan nasa labing diez mil na evacuees.

Sa sistematico, coordinado asin eficienteng pagmanejar asin maninigong intervention kan LGU, namantenir an zero casualty asin nasimbagan an mga pangangaipo orug na sa panahon na peligroso sa buhay asin propiodad.

Pigbuyagyag ni MDRRMO Obias, na sa presente pigtagamahan na nin alocasyon kan LGU an initial phase kan pagconstruir nin bagong MDRRMO building sa government compound sa barangay Boclod digdi.

An bagong edificio magkakaigua nin mahiwas na espasyo asin laguerta na  maacomodar nin buwelo asin segurado kan mga vehiculo asin gamit kan saindang oficina, dagdag ni Obias.

Yaon man sa government compound iyo an mga edificio kan Rural Health Unit, PNP asin BFP. Pighihiling kan MDRRMO na ini dakolang ventaje sa sainda para sa mas eficiente, buwelo asin coordinadong pagtatarabangan orug na sa panahon nin calamidad asin emergencia.