LGU sa Partido Area may Ambulancia Hale sa DOH

Ni Sonny Malate

Duwang banwaan sa Partido Area an nakarecebing tigsarong unit nin ambulancia hale sa Department of Health (DOH) Regional Office No. 5. Ini an San Jose asin Garchitorena, Camarines Sur.

Sa bilog na Bicol, 14 gabos na mga ambulancia an pigrelease kan DOH  bilang  parte kan Health Facilities Enhancement  Program kan ahenciang ini.

Sa Albay, anom na LGU an nataohan nin ambulancia, apat sa Camarines Sur, kairiba an Gobyerno Provincial asin ciudad kan Naga asin an duwang LGU sa Partido Area. Duwa man an pig-release sa Catanduanes asin tigsaro an Sorsogon saka Masbate.

Manonotaran na mahalagang gayo an pagkakaigua nin ambulancia sa mga banwaan orug na sa hararayong coastal na lugar. Sa kadakol na beses an mga pasyente digdi an pigdadara sa ciudad o banwa na iguang facilidad na pangsalud huli sa kakulangan o kawaran nin hospital digdi na iguang completong servicio.

Sinda Alkalde Jerold B. Peña kan San Jose asin Leda S. San Luis kan Garchitorena an parehong dakola an pag-apreciar asin pasasalamat sa DOH, sa paagi ni Sec. Teodoro Herbosa asin oficiales kan DOH Bicol. An turn-over ceremony kan mga ambulancia  ginibo sa DOH Regional Office No  5, ciudad nin Legaspi. 

An dagdag na ambulancia nagcocomplemento sa mga libreng serbisyong pangsalud na pig-iimplementar ni Peña para sa San Jose. Sa presente, igua nang tolong unit nin ambulancia an saiyang banwa.

An kaparehong vehiculo an dakolaon man na tabang sa pagtransportar kan mga  pasyente sa harayong banwa kan Garchitorena paduman sa ciudad nin Naga.

Durante kan turn-over ceremony yaon  man an mismong mga hefe ehecutivo o representes kan 14ng  local government unit na nabiyayaan kan kaparehong vehiculo.

Sa sinabing actividad, pigtawan doon ni out-going DOH undersecretary asin  Bicol Regional Director Nestor F. Santiago an kahalagahan kan pagkakaiguang ambulancia sa pag-extendir nin de calidad na medical transportation. Segun ki Santiago, ini parte kan pagbusol kan Universal Health Care kan gobyerno.

Pinahayag man kan papalaogon na Officer- in- Charge kan DOH Bicol, Dr. Rodolfo Antonio M. Albornoz na an Departamento de Salud sustenido sa pagduhol nin de calidad na serviciong pangsalud para sa kagabsan.

Dagdag pa man ni Albornoz na an pag turn-over kan ambulancia sa mga local na gobyerno sarong mayor na lakdang sa pagduhol kan DOH nin completo asin tamang access sa medical transportation para sa mga pasyente.

An kada sarong ambulanciang pigrelease kan DOH nagcacantidad nin P1.9 milyon. Ini completo sa mga medical equipment arog kan medical oxygen, stretcher, automatic external defibrilator, portable suction machine, aneroid sphygmomanometer, heavy duty stethoscope, nebulizer asin iba pang equipaje.

Duwa sa 14 unit nin ambulancia an pigbabasbasan antes kan rurn-over sa mga recipienting LGU sa Bicol. Photo- DOH CHD Bicol