LGU San Jose igua nang bagsakan nin gulayan

Ni Sonny Malate

SAN JOSE, Camarines Sur --- Nagbukas na an Bagsakan nin Gulay o Vegetables Trading Post sa banwaan na ini. An  bakalan nin mga local na productong pang-agriculultura namumugtak sa lumang edicio kan Municipal Agriculture Office (MAO) sa barangay San Antonio.

Ini nasa pamamahala kan Saint Joseph Vegetable Growers Association sa pamamayo ni Felizardo Ramos Jr. Suportado man ini kan Municipal Agriculture (MAO), Alkalde Jerold B. Peña asin Department of Agriculture Regional Office No. 5 (DARO 5)

Segun ki Grace T. Santelices, Municipal Agriculture Officer, an paglatag nin mga Bagsakan nin Gulay pig-eencaminar kan Departamento de Agriculura (DA) sa paagi kan Administrative Order # 27, s. 2020, kun saen pigbubusol an pagpagantad kan agri-business sa bilog na nacion.

An pagkakaigua nin Vegetable Trading Post digdi an nagcocomplemento man sa kahurotan ni Alkalde Peña na pauswagon an sector kan agricultura sa San Jose sa paagi kan kaparehong bagsakan nin mga producto,  bako sanang mga gulayon kundi magin orig asin iba pang mga livestock.

Dinagdag man ni Santelices na an mga productong mababakal sa bagsakan mas hababa an presyo kun icocomparar  sa ibang mercado sa pagtaraid na lugar. Ini huli ta dae na ini maagi sa kamot kan middle men na nagreresulta sa halangkaw na selling price sa mga consumidores.

Segun pa man sa Municipal Agriculture Officer, an mga producto digdi an mas salvado sa mga pesticidio na parating ginagamit kan mga paratanom nin gulayon sa Baguio asin ibang runa kan nacion. An MAO kan San Jose an higot na nag-iimplementar kan policia sa organic farming.

An San Jose iguang 172.06 hectarias nin kapatagan sa bilog na banwaan na iguang mga pananom na gulayon. Apwera sa pansadiring consumo kan mga paratanom, an kadaklan kaini an pigdadara sa mercado o pigbabakal kan  mga para pustor o middle men mismong sa mga parauma.

An mga gulayon na mababakal sa bagsakan na gikan sa local na mga paratanom iyo an pechay, talong, pipino, marigoso, balatong, kalabasa, upo asin iba pa.

Sa katakod na impormasyon, pigbuyagyag ni Santelices na an banwaan nin San Jose igua naman nin KADIWA Center na namumugtak sa PAGCOR Multi-Purpose and Evacuation Center sa barangay Salogon. 

An Center na pigmamanehar kan sarong cooperativa an nagin recipiente nin hasta sa Kinyentos Mil (P500.00) Pisos na grant hale sa gobyerno national.

An pag-extender kan cantidad  may katuyohan na masuportahan an capabilidad kan sector kan parauma asin parasira sa pagigin pusog na supplier nin food commodities asin pagsustenir kan mga grupong nakabase sa comunidad.

Mientrastanto, sinabi ni Santelices na an saindang ahencia an maigot sa  pagtaong  suporta sa mga existidong farmers group tanganing magin calificado sa mga man-iba-ibang grant hale sa DA. 

An banwaan nin San Jose  midbid bilang “Rice Granary” kan Partido Area. Kan  nagtalikod na mga taon ini an piggawgawan kan prestigiosong  Hall of Fame Award kan DA Central Office sa National Rice Achievers Award.

Si MAO Grace T. Santelices asin vegetable growers sa Bagsakan ng Gulay sa banwaan kan San Jose. (Photo LGU San Jose)