LGUs dai nagtagama nin fondosa bakuna sa ‘21 annual budget
An mga lokal na gobierno sa Camarines Sur andam na magtagama na sana nin alokasyon sa bakuna contra sa coronavirus disease (Covid-19) envez na magbugtak nin sadiring fondo sa saindang 2021 annual budget.
Ini an mga pahayag kan nagkaperang alcalde mantang naglalaom sinda na igwa nin maabot na suplay na libreng bakuna hale sa gobierno nasyonal.
Sinda Alcalde Tomas Bongalonta kan LGU Pili, Alcalde Eduardo Severo kan LGU Calabanga, Alcalde Cris Lizardo kan LGU Minalabac, asin Alcalde Bernard Brioso kan LGU Libmanan nagpahayag na kun pera an saindang kaipuhan na fondo andam na magtagama mantang igwa man sinda nin makukuanan nin fondo alagad dai nagbugtak nin suhay na alokasyon sa saindang annual budget.
An problema sa mga 5th class municipalities arog kan Milaor, Gainza, San Jose, asin Bombon mayong kakayahan na mag-alokar nin dakulang fondo nganing makabakal nin sadiring Covid-19 vaccine.
Sa San Jose, Camarines Sur sinabi ni Consejal Audie Concina nin huli ta an saindang municipalidad sarong 5th class municipalities naglalaom sinda kan tabang hale sa gobierno nasyonal.
Naglalaom nalang an kadakle sa mga 5th class municipalities kan ibabariwas na libreng suplay kan bakuna hale sa gobierno nasyonal.
An ibang LGUs naghahanap nin paagi na makakua nin alokasyon kasunod kan mga pahayag ni Presidente Rodrigo Duterte na tinatawan ninda nin poder na magbakal nin bakuna kun sain ninda gustong makipag-negosyar na pharmaceutical company.
An Ciudad nin Naga, na sarong 1st class city igwa na nin sadiring fondo mala ngani nakatagama na an P50 milyon nganing ibakal nin bakuna hale sa AstraZeneca.
Sa saindang 2021 P1.4 bilyon annual budget igwang alokasyon na P10 milyon alagad naghanap nin paagi nganing gibohon nang P50-M.
Target kan City Hall na maenot mabakunahan an 37 por ciento kan 284 mil na populasyon alagad prioridad giraray an mga health workers.