top of page

LGUs, MRRMCs sa CamSur naka-alerto vs flash flood

Kasunod kan nangyaring flash flood sa national highway kan Barangay Sta. Teresita, Baao, Camarines Sur kan Sabado, Hulyo 9, an Capitolio Provincial nagpaluwas nin memorandum sa mga alcalde, MDRRMC, Punong Barangay, asin BRRMC na maging alerto sa flash flood.


Si Gobernador Vincenzo Renato Luigi R. Villafuerte nag-isyu nin ‘‘Flash Flood Advisory’’ sa paagi kan saiyang memorandum petsado Hulyo 10, 2022 sa sinambit na mga opisyales lokal asin barangay nganing parating naka-andam sa ano man na calamidad.


Sinabi kan joven na gobernador saiyang pig-alerto an mga alcalde sa ciudad asin municipalidades kabale na an DRRMOs para marikas asin maka-aksyon tolos sa mga insidente siring kan mga minasunod:


1. Mag-monitor sa mga insidente nin tubig baha sa saindang kanya-kanyang area of responsibility asin tolos mag-report sa EDMERO Emergency Operation Center;


2. Dapat magpaluwas tolos nin amay na patanid sa mga komunidad lalo na sa mga hazard-prone areas nganing maibitaran an ano man na insidente;


3. asin dapat regular an pag-aram kan kamugtakan kan panahon sa PAGASA.


Si nangyaring flash flood sa Baao, Camarines Sur mayo man nin nalugan alagad nabigla sana an residentes kasunod kan thunderstorm kan Sabadong hapon.


Ngunian na bulan base sa report kan PAGASA iyo na an pagpoon kan mga pag-uran. (dpa)


Comments


bottom of page