LGUs nag-aandam na kan devolution transition plan

An Department of Interior and Local Government (DILG) sa Camarines Sur nag-eenganyar sa mga lokal na gobierno (LGUs) na magbilog nin devolution transition team nganing punan na an saindang pag-aadal kan posibleng punskyon base sa seksyon 17 kan RA 7160 o Local Government Code alagad dapat halaton muna an ipapaluwas na guidelines hale sa DBM asin DILG tanganing igwa sindang basehan sa paghaman kan devolution transition plan.

Ini kasunod man kan pinaluwas na Executive Order No. 138 ni Presidente Rodrigo Duterte sa implementasyon sa pagbalyo kan mga gagastoson na fondo sa mga proyekto sa insfrastraktura, agricultura, social welfare, health care, livelihood asin iba pa.

Si Provincial Director Melody Relucio kan DILG nagpahayag sa entrevista kan Bicol Mail mantang sa nakatalaan na pagsikad sa iimplementar na Mandanas-Garcia ruling sa 2022 dapat an pighihiras sa IRA sa LGUs kabale na an buwis nasyonal bako lang si hale sa nakokolekta kan Bureau of Internal Revenue (BIR).

Huli kaini, malangkaw na nin 37.89 por ciento an makukuang National Tax Allotment (NTA), dating internal revenue allotment (IRA) kan gabos na LGUs, sabi ni Relucio.

Sa desisyon kan Korte Suprema sa Mandanas-Garcia ruling an mga LGU magkakaigwa nin dakulang fondo, nganing saindang gastoson sa mga proyekto base sa EO 138 ni Presidente Duterte.

An Mandanas-Garcia ruling resulta man kan petisyon sa Corte Suprema ninda Batangas asin dating pamayo kan Liga nin mga gobernador Hermilando Mandanas asin ni dating Gobernador Enrique Garcia Jr. kan Bataan. An En Banc decision kan Korte Suprema binaba kan July 3, 2018.

Kabale sa mga ahencia nasyonal na kaayon sa ipapasa-irarum sa devolution sa LGUs iyo an Department of Social Welfare and Development , Department of Agriculture, National Irrigation Administration, Department of Environment Natural Resources, Department of Education, Department of Public Works and Highways, asin iba pang ahencia.

An mga ahencia nasyonal obligado na magsumiter kan saindang devolution plan sa Devolution Committee pinamamayohan kan DBM nganing basehan kan saindang operasyon mantang dakulang cantidad kan fondo an guguntingon nganing an cuarta ibalyo sa LGUs.

Dakula an posibilidad na dakul na mga empleados an mawawaran trabajo huli ta ciertong iimplementar an retrenchment program alagad igwa sindang opyson na magretiro nin amay, magbalyo sa ibang ahencia maging sa LGUs depende kun igwang bakanteng item. (DPAureus)