LGUs sa Partido nakaguno nin onra sa PDEA
- Bicolmail Web Admin
- Aug 30
- 2 min read
Ni Sonny Malate
Apat sa walong mga local government unit (LGU) sa Bicol na nakarecebi kan Balangay Seal of Excellence award hale sa Philippine Drug Enforcement Agency (PDEA) an gikan sa Partido Area. Ini an Caramoan, Sagñay, Lagonoy asin Goa.
An award iyo an pinakahalangkaw na pagreconusir kan PDEA sa sustenidong esfuerzos asin dedikasyon sa pag-implementar kan campanya contra sa ilegal na droga sa irarom kan Barangay Drug Clearing Program (BRCP). An programa may katoyohan na mailikay asin protehiran an namamanwaan sa ilegal na droga.
Sa banwaan kan Goa, ipinahayag ni PMaj Ronald P. Brugada, Acting Chief of Police (ACOP) kan Goa Municipal Police Station (MPS) na an 34ng mga barangay sa banwaan na ini declarado nang drug free asin drug cleared durante pa kan nakaaging administrasyon kan duwang local na hefe ehecutibo.
Sa presente, an anti-ilegal drug campaign kan LGU padagos na suportado kan bagong naelehir na alkalde, Raquel S. Lim.
Segun sa ACOP, dakula an tabang kan Barangay Anti - Drug Abuse Council (BADAC) sa mga esfuerzos na ginigibo kan Municipal Anti-Drug Council (MADAC) dapit sa programa contra ilegal na droga sa localidad.
Base sa datus kan Goa Municipal Police Station (MPS), magpoon kan Enero hasta Junio ngonian na taon, apat na drug buy bust operation an matrayumpong piggibo.
May sarong caso man nin shoplifting kun saen an invueltong persona nakuahan nin marijuana asin sachet na iguang pigtutubodan na shabu. Nairecord man sa kaparehong periodo an ginibong drug buy bust operation sa paagi kan Provincial Intelligence Unit (PIU) kan PNP.
Piglinaw ni Brugada na base sa mga naaprehendir ninda, mga street level pusher sana asin mayong mga invueltong high value drug personalities an yaon sa Goa.
Dagdag kan acting chief, dawa na ngani an Goa an pigcoconsiderar na centro kan comercio asin progreso sa Partido, mayong existidong datus na magpapatotoo na bagsakan ini kan ilegal na droga sa cuatro distrito.
Mientrastanto, pigbuyagyag ni Brugada na tanganing efectivo asin marikas na masimbagan an pagmantenir kan paz y orden, pig-initiar niya an pagkakaiguang designadong pulis sa nasasakopan nindang mga barangay.
An pulis na ini dae man mismo presente sa pigtaltagan na barangay, alagad siya an nagseserbing focal person sa mga bagaybagay na dapat ipaabot sa mga nanunungdan na tawo o oficina para sa maninigong action.
Piglinaw kan acting chief na an Goa MPS iguang Facebook account asin contact number na bukas sa publico tanganing masimbagan an pangangaipo orug na kun may emergencia. Apwera kaini, may group chat pa na kabale an mga oficiales de barangay tanganing marikas an comunikasyon.
Si Brugada nangapodan sa mga Goaeño na pangataman an sadiri, pamilya asin comunidad contra sa kararatan na dara kan droga. Pigtawan niyang doon na dawa na ngani drug cleared asin drug free na an Goa, sustenido sinda sa campanya contra sa pigpapangalad na droga.
Comments