top of page

Libreng abuno pinapanao sa mga paraoma kan DA Bicol

Pigpapadagos kan opisina rehiyonal kan Department of Agriculture (DA) an pagwaras nin ayuda sa mga paraoma na apektado nin tubig baha huli kan halawig na mga pag-uran kan Deciembre 2022 hasta Enero ngunian na taon.


Sa ngunian an DA iyo an masuplay nin duwang sakong abuno sa paagi nin voucher na cantidad P6,600 na kukuanon sa tiendahan kan supplier kan ahencia.


An mga benipisyaryo dapat igwang dukumento na ipapaheling na retrato binaha an saindang paroyan asin dai na mapapa-kinabangan.


Alagad si igwa sanang duwang hektaryang omahan an calificado nganing makabali komo benipisyaryo nganing matawang nin libreng abuno.


Ini an mga pahayag ni Lovella Guarin, regional spokesperson kan DA Bicol kasunod man kan enot na asegurasyon kan ahencia na igwang ayudang palay seeds asin abuno an itataong tabang nganing magpadagos sa pag-oma.


Saiya pang dinagdag na dapat rehistrado an paraoma sa Registry System for Basic Sectors in Agriculture (RSBSA) mantang kukuanon sa Municipal Agriculture Office an voucher.


Sa paagi kan MAO an DA enot nang nagdistribuer sa mga paraoma nin palay seedlings. (dpa)

Comentários


bottom of page