Libreng goto sa Semana Santa ibabawal na kan local IATF
An Municipal Police Station kan Calabanga, Camarines Sur magiging estricto sa pagbawal kan mga libreng goto asin ano paman na street foods sa gilid kan tinampo na dating ginigibo kan mga organisasyon nganing itao sa mga deboto ni Amang Hinulid na ma-penitential walk hale sa pagtaraid na banwaan pasiring sa kapilya kan Hinulid sa barangay Sta. Salud.
An local IATF sa pamamayo ni Alcalde Eduardo ‘‘Ed’’ Severo nagpahayag na dai na ngona tutugotan an dating kinaugalian na igwang mga organisasyon na voluntad nagpapa-goto asin iba pang pagkakan afuera sa libreng bottle water sa nag-aalay lakad o ‘‘penitential walk’’ kun Jueves Santo nganing magsungko sa melagrosong Amang Hinulid.
Para sa proteksyon sa salud o sa caso sa Covid-19 mientras na nasa irarum pa sa Alert level 2 an saindang banwaan, sabi pa ni Severo.
Sa 35 banwaan sa Camarines Sur an pigdeclara sana kan national IATF sa Alert level 1 iyo an Bombon, Cabusao, Camaligan, Presentacion, San Fernando asin Ciudad nin Iriga alagad an iba pang mga banwaan mantenido sa Alert level 2.
AMANG HINULID SA CALABANGA, CAMSUR. Dinadayo nin ribo-ribong mga debotos hale sa manlaen-laen na provincia maging turista nganing magsungko sa melagrosong imahen ngunian na Jueves saka Viernes santo, alagad mantang nasa Alert level 2 an banwaan nin Calabanga iluluwas sa Viernes, Abril 15 sa paagi kan motorcade procession. (dpa)
Ribo-ribo an masunko sa Hinulid sa maabot na Jueves asin Viernes Santo dawa dai nang panahon an mga awtoridad na magsitar kun sinda mga bakunado, alagad nag-apelo an jefe ejecutivo na magcooperar an publico kun dai pa fully vaccinated dai na ngona magpasiring sa saindang banwaan nganing malikayan an pagulakit sagcod maging super spreader kan virus.
An Departmento de Salud iyo na an nagpapatanid na posibleng maging causa kan paglangkaw kan caso sa Covid-19 an mga nangyayaring political rallies maging an dai nasusunod na social distancing sa mga actividades kan simbahan sa Semana Santa.
An prusesyon sa Amang Hinulid asin iba pang mga santo sa paagi nin motorcade na cada santo igwang nakasunod na saro sanang vehiculo. An ipapasunod na mga bagong guidelines asin sa health and safety protocols para man sana sa proteksyon sa salud kan namamanuan huli ta yaon pa an homa kan Covid-19, sabi pa ni Severo.
Tatawan buelo an ma-penitential walk kan mga deboto, sarado sa trafico sa kalabaan kan tinampo sa Santa Salud saka San Miguel. (dpa)