Libreng parking fee sa senior citizen, PWDs halat nalang an pirma ni Legacion

Aprubado na sa Sangguniang Panlungsod kan Ciudad nin Naga an ordinansa na libreng parking fee sa mga mall kan mga senior citizen saka mga person with disability (PWDs).

Alagad hinahalat nalang na pirmahan ni Alcalde Nelson Legacion nganing maging epektivo, sabi sa Bicol Mail ni Consejal Jess Albeus.

An consejal iyo an nagpadreno kan ordinansa sa tahaw kan ginibong pagsingil sa parking fee na cantidad veinte pesos kan sarong mall sa ciudad na posibleng ipasunod man sa ibang establisimiento sa centro kan ciudad.

An Senior Citizen Association asin PWDs sa ciudad nagpahayag nin kaogmahan ki Albeus huli ta dakulang tabang sa saindang sektor sa tahaw kan sinisigil ngunian na P20.00 cada garaje kan sarong vehiculo.

Posibleng gibohon kan ibang mall an parking fee asin an pagkaka-aprubar kan SP igwa nang ley local nganing sunodon.

Kun maaprubaran an masinutil sa ordinansa puedeng mapinaran nin sagcod sa P5,000.

Antes naaprubaran kan miembros kan sangguniang nag-agi sa proceso sa public hearing na nagtugot man an sektor nin negosyante asin iba pang sektor, sabi pa kan Consejal.