Libreng pustiso parasa ‘‘laylayan’’-Albeus

Bako gabos na residentes kan Ciudad nin Naga na kulang nin ngipon an puedeng makaaprubetsar kan ‘‘Libreng Pustiso’’ sa lindong kan propuestong ‘‘The Healthy Smile Ordinance’’ envez para sana sa mga tios na familia o si daing kakayahan magpasiring sa pribadong dental clinic.

An mga nagpapabor digdi nagpahayag na dakul an matatabangan na mga nasa ‘‘laylayan’’ oras na maaprubaran an ordinansa mantang sa ibang mga municipalidad nagkakaigwa sana kan programa sa libreng pustiso kun panahon nin eleksyon.

Sa entrevista kan Bicol Mail ki Consejal Jess Albeus, padreno kan propuestong ordinance sa Sangguniang Panlungsod sinabi kaini kun maaprubaran kabale sa calificado si mga ‘‘indigent’’ na dapat kumpletohon ngona an mga minasunod na rekisitos, certificate na sinda nasa ‘‘laylayan’’ hale sa City Social Welfare and Development Office (CSWDO), Barangay Certificate, ID, asin Certificate hale sa Bureau of Internal Revenue na tax exemption.

An mga benipisyaryo makikinabang para sa inaapod na prosthetic dentures and prosthodontics service.

An sinambit na papeles iyo an magpapatunay na sinda calificado sa libreng pustiso kan lokal na gobierno bilang kasimbagan sa petisyon kan Camarines Sur Dental Association na nagcocontra sa propuestong ordinansa.

Segun pa ki Albeus pigcocontra kan dental association huli ta makukumpetensya an saindang private dental practice.

Dinagdag pa kan consejal na ilalaag sa ordinansa na dapat cada bulan limitado sana sa 30 pasyente mga benipisyaryo na igwang total na 360 sa laog nin sarong taon.

An puntong ini mayo nang dahilan nganing contrahon pa mantang an obligasyon kan gobierno matabangan an pobreng namamanuan, sabi pa ni Albeus.

Padagos nang yaon sa proceso sa sangguniang antes aprubaran na enot nang hale sa public hearing kan Committee on Laws and Ordinance sa pamamayo ni Consejal Oying Rosales.

Nagtutubod si Albeus na maaprubaran man giraray sa Sangguniang Panlungsod an saiyang propuestong ordinansa. (dpa)