Libreng sakay bakong solusyon sa halangkaw na presyo kan petrolyo

Pinadagos kan Land Transportation Franchising and Regulatory Board (LTFRB) sa Bicol an Libreng Sakay dawa dai pa nakakabayad an ahencia sa phase 2, alagad an programang ini kan gobierno bakong solusyon sa semanal na pag-ulanto sa presyo kan produkto nin petrolyo.

Ma sarong taon nang dakul pang mga jeepney operator/driver an sagcod sa ngunian dai pa nababayadan mala ngani dai pa na viente por ciento an nakarecibe nang bayad na operator sa lindong kan Service Contracting Program (SCP) kan ahencia.

Maging si fuel subsidy an sagcod sa ngunian padagos pang nakapako.

Ini an tuyaw kan Condor-Piston Camarines Sur kan makuanan nin entrevista si Joel Pillogo, lider kan sektor nin transporte sa provincia.

Liwat binalik kan LTFRB an Libreng Sakay alagad obligasyon ninda na bayadan na si enot na grupo nakabale sa enot nag-aprubetsar kan Service Contracting Program.

Marhay si may dakulang kapital na operator na iyo an nalaog sa Phase three kan SCP alagad si mga tios na operator asin tsuper tada nang raya huli ta ma sarong taon na dai pa sinda binabayadan.

An programang libreng sakay sa mga Health Care Workers asin Authorized Persons Outside Residence (APOR) na pigpaparticiparan kan mga public utility vehicles (PUVs) nag-designar nin sarong lugar an ahencia bilang saindang pick-up/drop off points.

Sa Ciudad nin Naga an libreng sakay nagpuon kan Abril 18, 2022 sa mga minasunod na ruta, South Bound na viajeng Sipocot-Naga; Libmanan-Naga; asin Pasacao-Naga. North Bound na may viajeng Magarao-Naga; Calabanga-Naga; Canaman-Naga asin Tinambac-Naga asin West Bound may viajeng Naga-Legazpi.

An opisina rehiyonal kan LTFRB nagpahayag na sa masunod na semana mabukas nin dugang na ruta para sa saindang phase three kan SCP.

An mga viaje puon Lunes hasta Viernes sa oras na alas 6:30 nin aga hasta alas 6:30 nin banggui.

Sagcod sa ngunian dai pa makatao nin aldaw an LTFRB Bicol kun nuarin mababayadan si mga naglaog sa phase two kan SCP. (dpa)