Libreng sakay tagulnod sa planong ‘‘tigil pasada’’

Madidificilan an plano kan sektor nin transporte sa Metro Manila asin sa iba pang provincia na mag ‘‘tigil pasada’’ an jeepney drivers na dai man sana mapaparalisar an viaje huli kan ‘‘libreng sakay’’ sa lindong kan Service Contracting Program (SCP) kan Land Transportation Franchising and Regulatory Board (LTFRB).


Ini an pahayag ni Joel Pillogo, lider kan Pagkakaisa ng mga Samahan ng Tsuper at Operators Nationwide (Piston) sa Ciudad nin Naga asin Camarines Sur sa tahaw kan plano kan saindang grupo sa Metro Manila na nagpapatanid na posibleng magpundo na magkayod mientras na lugi na gutom pa an familia.


Nagtutubod si Pillogo na an Service Contracting Program kan LTFRB planado na nganing kun magkaigwa nin ‘‘tigil pasada’’ igwang seguradong malulunadan an pasajeros.


An padagos na paglangkaw sa presyo kan produkto nin petrolyo apektado na an saindang hanap buhay mientras nalulugi man sana kan saindang pagkayod aroaldaw.


An Piston nagpatanid na mapipiritan na sindang magpundo sa pag kayod kasunod kan liwat naman na paglangkaw sa presyo nin petrolyo mala ngani sa pinakahuring presyo may dugang naman na Php7.00 cada litro sa crudo asin sa Php2.70 sa gasolina.


Sa haros cada semana paglangkaw kan produkto nin petrolyo nag-total na sa Php36.00 an dugang na presyo sa crudo asin Php26.00 sa gasolina na mapipiritan magpundo na kan saindang hanap buhay sa transporte kun malulugi man sana.


Digdi sa Camarines Sur naghahalat sinda kan koordinasyon hale sa Manila alagad sainda man ining aandaman kun mangyari.


Dinagdag pa kan lider kan transporte an ‘‘libreng sakay’’ bako man gabos na ruta asin igwa man giraray apektado kun madagos an protesta.


Nanindugan an Piston Camarines Sur dapat inadalan kan gobierno envez kan SCP, dapat sinuspende na muna an excise tax nganing dai magpara-langkaw an presyo kan petrolyo bako lang sinda an makikinabang alagad gabos na sektor.


Sa SCP kan Department of Transportation igwang alokasyon na Php7-bilyon mantang digdi sa Bicol igwang cantidad Php180-M. (dpa)