Lider activista sa Bicol nakaluwas na sa carcel
Naging maogma si tiripon sa selebrasyon sa pagsabat kan bagong taon an familia kan lider activista na si Marites ‘‘Tes’’ Pielago matapos tugotan kan corte na makapag-pyansa nin P600,000 para sa saiyang temporaryong libertad.
Limang bulan dai niya nakaibanan an saiyang familia alagad nakaluwas siya sa carcel kan Tinganis Provincial Jail kan Deciembre 27, 2022 o limang aldaw antes kan bagong taon 2023.
Si Juez Wenifredo Pornillos, Jr. iyo an nagtugot sa petition for bail kan Noviembre 21, 2022 sa saiyang sala, Regional Trial Court 5th Judicial Region Branch 59, Ciudad nin Iriga sa cantidad na P200,000 cada caso, tolong murder cases, alagad an motion na-aprubar na babaan an cantidad kan bail sa P100,000 sa cada saro.
An activista inarestar kan Hulyo 28, 2022 sa casong murder asin frustrated murder sa irarum kan Branch 36. Daing patawad an grupo kan kapupulisan arin militar mientras naka-confined sa Dr. Nilo Roa Hospital, sa Ciudad nin Naga, huli kan pagsusuka asin iba pang kamatian sa salud. Inarestar siya base sa mandamiento de aresto na pig-isyu ni Juez Maria Clarissa Pacis-Trinidad kan RTC Branch 36 sa Ciudad nin Iriga kan Agosto 8, 2019.
Pigsasahotan si Pielago na envuelto sa encuentro entre kan tropa kan gobierno asin NPA sa Bato, Camarines Sur kan 2018 na nagresulta sa pagkakagadan kan duwang pulis asin militar asin sarong ‘‘asset’’.
Siya kabali sa nagkapera nang kababaehan lider activista sa Bicol na inakusaran nin casong murder kan Philippine Army asin PNP, alagad an iba sa sainda temporaryong nakaluwas na sa carcel matapos makapag-pyansa.
Si Pielago kagpundar kan Bicolana Gabriela kan 1990 asin naging chairperson poon kan 2004 hasta 2017. Siya dating nagpupugol nin programa sa radyo ‘‘Pamana ng Lahi’’.
An Defend Bicol Stop The Attacks Network kinukundenar an pag-arestar kan mga militar sa lider activista ngani sanang maging silencio sa saindang pakikipag-laban sa deretso humano asin maprotehiran an namamanuan.
Si dating House Deputy Minority Leader Rep Carlos Isagani Zarate nagpahayag na an nangyari ki Pielago loma nang modus operande kan National Task Force to End Local Communist Armed Conflict (NTF-ELCAC).