Lider kan BAYAN CS nakaluwas sa carcel kan human rights day

Nakaluwas na sa carcel si BAYAN Camarines Sur Chairperson Nelsy Rodriguez sa aldaw na gayo kan pagkumemorar kan ika-73 na anibersaryo kan Universal Declaration of Human Rights kan Deciembre 10 matapos makatipon nin mga sinsilyo hale sa kontribusyon kan saiyang mga suportadores nganing ibayad na piyansa kasunod kan release order na binaba kan jusgado.


Nagrukyaw sa aldaw na ini bako lang si Rodriguez asin saiyang familia envez an mga human rights advocate sa Camarines Sur asin mga suportadores dawa na ngani nagsakripisyo nin sarong taon asin tolong bulan sa carcel an lider kan BAYAN.


Si Acting Presiding Judge Leo L. Intia kan Branch 64 kan Regional Trial Court Labo, Camarines Norte iyo an nagpaluwas kan release order para sa provisionary liberty kan akusado. An saiyang abogado iyo si Atty. Bartolome Rayco kan National Union of People’s Lawyer.


Nakabayad nin piyansa si Rodriguez sa ginibong kampanya kan Christmas Liberation, Campaign Raising na piglansar kan saiyang mga suportadores mantang naging emotional siya huli ta an kontribusyon igwang nagtaong Php5.00, Php10.00, asin Php20.00 hale sa manlaen-laen na ordinaryong namamanuan sa paagi kan trabajadores, tsuper, estudiantes, media, cultural workers, mga paraoma asin iba pang sektor mantang si kakulangan sa Php200,000 sa bail bond inutang kan familia sa saindang mga partidaryos asin suportadores.


Kan arestaron si Rodriguez sa saiyang residencia sa barangay Bagumbayan Sur, Ciudad nin Naga kan Septiembre 6, 2020 alas 9:45 banggui sinabi kaini na nabigla siya sa warrant of arrest kun pano siyang nakasohan nin ‘‘murder’’ na pig-akusaran na envuelto sa panghihipa sa biktimang militar sa Labo, CNorte mantang dakula an saiyang kahapotan kun pano siyang naging envuelto sa caso kriminal.


Nagpabisto muna komo barangay health workers an mga awtoridad antes pinaluwas an warrant of arrest kan maabot sa 20 kapupulisan an nag-arestar sa saiya sagcod na dinara sa Naga City Police Office asin pagka-aga dinara sa Camarines Norte Provincial Jail.


An mandamiento de aresto pinaluwas ni Juez Arriel Dating kan RTC Branch 64 kan Labo, Camarines Norte petsado Hulyo 3, 2020.


Sa pig-post na inpormasyon kan Youth Act Now Against Tyranny-Bicol, si Rodriguez midbid na lider-organisador na labi na sa sampulong taon na pinaglalaban an deretso kan namamanuan sa Kabikolan.


Nagtutubod sinda na langtadan na pagbalga sa deretso pantawo an nangyari sa saiya mantang dai nag-agi sa due process sa paagi kan preliminary investigation, antes siyang dinakop mayong narecibing subpoena hale sa Camarines Norte Provincial Prosecutor’s Office, nganing makasumiter man kan saiyang counter affidavit.


Sinabi pa na an iba pang mga inaresto sa mga cuestionableng caso kriminal iyo sinda Jenelyn Nagrampa kan Bicolana Gabriela asin Pastor Dan San Andres kan Karapatan Bikol.


Alagad dai naman nahaloy pigsunod si Rodriguez, Ramon Rescovilla kan Condor Piston Bicol kabale na an researcher kan Damayan nin mga Paraoma sa Camarines Sur na si Digna Aquilino.


Kan Mayo 2021 magkasuhay na pig-raid an residencia ninda Pastor Dan Balucio kan BAYAN Bicol, asin duwang lider Kabataan na sinda Justice Mesias ng YANAT Bicol asin Sasah Sta. Rosa kan Jovenes Anakbayan. Dai pa nakuntendo an estado sunod naman na inaresto si Elwin Mangampo kan LAMBAT-Bicol.


Kinukundenar kan mga human rights advocate sa Camarines Sur an padagos na nangyayaring pang-aabuso sa deretso humano sa mga aktibista.