Likay sa Bulong

KADAKLAN kan mga seniors nag aasa sa mga pang mantener nindang medesina. Pamilyar na marhay sa mga may edad an mga bulong arog kan para sa kolesterol, presyon, asin diabetes.

Siring man sa gabos na tawo, pamilyar man an pag pa reseta asin an mag sarig sa parmasya na mag tao kan tamang bulong.

Kan naka aging duwang aldaw kinua ko sa parmasya si mga pang mantenar kong bulong para sa kolesterol saka presyon. Labing sarong dekada na akong parokyano kan parmasyang ini. Kada duwang bulan, sinda na lang an naapod sa doctor ko sa pag padagos kan mga resetang pang mantener ko. Tapos, ina-apudan na lang ako kan parmasya kun naka handa na an bulong.

Pero arog kaini an nangyari. Pag abot ko sa harong binuksan ko si lalagan kan bulong para sa kolesterol asin nariparo ko na garo iba an itsura kan si tableta niya kumpara sa dati kong tableta sa kolesterol na mauubos na.

“Siguro ibang kompaniya an may gibo kan bulong na ini kaya iba an itsura niya”. Inapudan ko si sobrina kong nars.

“Pwede mangyari iyan Tito, pero hilingon mo po sa computer an mga numero asin itsura kan bulong na iyan asin ikumpara mo.” Simbag niya.

Hiniling ko pero mayo siya sa mga numero asin litrato.

Sa halipot na istorya, na diskobre ko na an nasa laog kan plastic na lalagan na may pangaran na para sa kolestero, bakong para sa kolesterol an nasa laog.

Si laman kan si para sa kolesterol, bulong palan para sa presyon. Sa madaling pag taram, nabaliktad kan parmasia si pag buktag ninda kan mga bulong sa tamang kaagan.

“Delikado asin seryoso ining na gibo kan parmasia.” An sabi ko sa sadiri ko.

Nagiromduman ko tulos si saro kong amigo na taga Bicol na nagadan ta sala si bulong kan si nasa reseta. An bareta ko napa sala daa si bulong na pig tao saiya kan parmasia. An sabi man kan iba, sala daa si reseta.

Kaya an ginibo ko, nagduman tulos ako sa parmasia. Pinahiling ko sainda si mga nariparo ko. Kinaulay ko si parmasistang superbisor ninda.

Pagka tapos nin didkit na halat, kinaulay ako kan si pamayo ninda duman sa parmasya asin nag sorry siya. Nag hagad siya nin tawad sa nangyari. Sabi niya dae daa dapat nangyari ini. Pinag sabihan niya daa si mga empleyado niya na dapat tolo na daang beses dapat inspeksyonon an mga bulong bago itao sa pasiente.

Pinatawad ko siya ta herak man. Habo ko man na may mawaran nin trabaho sainda. Otrong nag sorry asin nag hagad nin tawad si pamayo ninda.

Rinibayan man kan parmasia si mga napa sala nindang bulong. Pero sinabi ko sainda na sa negosyong ini dapat siento porsyento (100%) sinda pirming tama.

Nagsusurat ako manungod sa pangyayaring ini nganing maski puro-pano maipa abot ko sa mga nagbabasa kaini na kaipuhan kita mag likay sa pag bakal asin pagpa reseta nin bulong. Siguraduhon ta na tama an bulong na nasa reseta asin an bulong na tinatao kan parmasia. Siguraduhon ta man na tama an tabletang bulong sa laog kan lalagan.

Kun may suspetsa po kita na sala an bulong, mag hapot po tulos kita.

Nag papasalamat ako sa Kagurangnan, ta nariparo ko ining pangyayaring ini. Sigurado ako na dae na mangyayari ini duman sa parmasya ko ta nagamiyawan ninda na delikado ining nangyaring ini.

Para sakuya, pinag iisipan ko po ngunian na mag balyo na sa ibang parmasia.

Dios Mabalos po sa pag basa.