Limang bulan na election period nagtapos kan Hunyo 9, matuninong

Nagtapos na si limang bulan na election period kan Hunyo 9, 2022 naikurit kan Bicol PNP an zero crime incident namay relasyon sa nakaaging eleksyon nasyonal asin lokal kan Mayo 9.


Dawa an provincia nin Masbate na haros cada panahon nin pirilian perming declarado kan Commission on Election asin PNP bilang election hot spot, zero crime incident.


Si Regional Director BGen. Mario Reyes kan Camp Semion Ola sa Ciudad nin Legazpi nagpahayag na dakulang bagay an saindang ginibong estrictong kampanya sa gun ban asin nagwarak nin 20,912 mga Comelec-PNP Check point.


An nagkapera sa mga candidato lokal sa provincia nin Masbate nagsuko kan saindang de calibreng armas sagcod nagkasundo an poderosong politico na matarabangan nganing maging matuninong an eleksyon.


An PNP asin Philippine Army nagdestino kan saindang augmentation force nganing magmantenir na maging onesto asin matuninong an eleksyon.


Gabos na polling center nagdestinong kapupulisan mantang si yaon sa bukid na barangay mga miembros kan Philippine Army.


Sa listahan kan Bicol PNP igwang total 123 na mga nagkadarakop sa pagbalga sa Comelec gun ban alagad an Masbate iyo an may halangkaw na caso na nag-abot sa 37 nagkadarakop na anas nang nag-aatubang nin caso.


An iba pang provincia an Camarines Sur igwang nadakop na 19; Sorsogon 17; Albay – 15; Camarines Norte – 9; asin Catanduanes – 2. Sa Ciudad nin Naga igwang mga nadakop na may darang patarum alagad kabale sinda sa sinangatan nin caso sa Comelec gun ban.