Live concert karibay kan Voyadores festival 2022

Bilang pangribay sa Voyadores Festival na pigpaoktaba nguna ngonian na taon kan lokal na gobyerno iyo an konsyerto nin mga banda sa Plaza Quezon na babalehan nin mga local artists sa syudad nin Naga asin sa probinsya nin Camarines Sur.


Segun ki City Events Protocol and Public Information Officer Allen Reondanga, tolong banggui, Setyembre 13 sagkod 15, sa Plaza Quezon an konsyerto kan local artists.


Pigsabi pa ni Reondanga na uyon sa okasyon asin sa audiences an genre kan musika na papatugtugon kan local artist mantang nagpapadagos an novena ki Nuestra Señora de Peñafrancia sa Naga Metropolitan Cathedral.


Pigpaoktaba an Voyadores festival huli sa kawaran nin bastanteng oras para sa preparasyon kan mga eskwelahan na mawot magpartisipar kaya pigtagama na sana para sa security fund kan fiesta an pigalokar na P800,000 para sa makolor na civic event. (Paulo S. Delos Santos)