LMP Suportado an mga Paraorig
Ni: Sonny Malate
San Jose, Camarines Sur--- Nagpahayag nin bilog na suporta sa mga paraorig sa Partido Area si Mayor Rey Lacoste, pamayo kan League of Municipalities of the Philippines (LMP) Camarines Sur chapter.
Sa ikatolong mobile meeting kan LMP na ginibo sa banwaan na ini, binutasan an asegurasyon kan alkalde sa organizer kan Partido Federation of Hog Raisers and Breeders Associations, Rayson P. Glodoviza, dapit sa tabang niya.
Segun ki Lacoste siya saro man na paraorig kaya nasasabotan niya an kamugtakan kan nasa livestock industry.
Si Glodoviza asin nagkakapirang pamayo kan mga paraorig sa Partido Area nagin bisita sa meeting kan mga alkalde sa imbitasyon ni Mayor Jerold B. Peña kan San Jose, secretary kan LMP Camarines Sur chapter.
Alkalde Rey Lacoste (sa wala), Presidente kan LMP Camarines Sur chapter asin Mayor Jerold B. Peña, Secretary
Segun ki Glodoviza, an pinakaproblema ninda ngonian iyo an hababang presyo kan live weight por kilo kan ataman nindang orig. Siring man, an dae maampat na paglumpat kan presyo kan commercial feeds asin biologics.
Dinagdag pa ni Glodoviza na sa presenteng presyo kan barakalan na P150.00 hasta P155.00 por kilo kan live weight kan orig, deficilon sa sainda an maabot dawa an puntong break even tanganing masusteniran an saindang negosyo.
Tanganing magkaigua nin makusog na boses asin legal personality, an grupo ni Glodoviza naglapigot na maorganizar an mga paraataman nin orig sa Partido Area bilang federation. Oras na macompleto na an mga requisitos, ini ipaparehistro sa Securities and Exchange Commission.
Sa tabang man ninda Alkalde Lacoste asin Mayor Peña, naglalaom an mga hog raisers sa Partido Area na mabibilog an federation sa bilog na probinsyang Camarines Sur sa orug na madaling panahon.
Sa paagi kan federation naglalaom sinda na madali an pagregulate kan presyo kan live weight kan orig sa lado kan local buyers asin mga dayong hog traders.
Sa paagi pa man kan province-wide na hog raisers federation, linalaoman na magigin madali an paghagad nin asistencia sa mga pribado o pampublicong ahencia.
Nanotaran ni Glodoviza na an Department of Agriculture nag-eextendir nin tabang sa mga paratanom nin paroy saka gulay asin parasira alagad mayo ining ayuda sa mga paraorig.
Katakod kaini, sa ginibong meeting kan San Jose Municipal Price Monitoring Council kan nakaagin mga semana, si Grace T. Santelices, Municipal Agriculturist, nagpahayag na ipapaabot niya an situation na ini sa Department of Agriculture-Bicol para sa maninigong action.
Mga paraorig lapigot sa negosyo sa tahaw kan hababang presyo kan ataman na hayop.