Local na gobyerno kan Goa igua nang LODI

Ni Sonny Malate

Goa, Camarines Sur --- Sa esfuerzos kan huben na bise alkalde Marcel Michael P. Pan nagpoon na an pag-extendir nin libreng  servicio legal sa mga Goaeño an Lawyer of the Day Initiative (LODI).

An LODI sa Goa primero sa Partido Area. Ini nahimo ni bise alkalde Pan sa pakikipagtabangan  kan Integrated Bar of the Philippines (IBP) Camarines Sur Chapter. An LODI piglatag kan IBP sa bilog na nacion asin bukas urog na sa mga tios na namamanwaan. 

An LODI sa Goa nakabase mismo sa oficina ni Pan. Ini bukas kada aldaw na Martes asin Huwebes. Sa paagi kan tolong abugadong nagriribayribay nin eskedyul digdi,  an mga Goaeño nakakaguno nin libreng consultation legal. 

Segun sa bise Alkalde man-iba-ibang mga isyu, conflicto asin problema na kaipo an kadunongan kan sarong abugado an pigdudulok sa LODI tanganing mataohan nin tamang solusyon. 

Dagdag niya,  an nagcoconsulta digdi  tinatawan nin asistencia na magkaiguang libreng abugado hale sa gobyerno o privado incasong mag-abot an pagresolver kan isyu sa  asunto sa husgado. 

Naoogma an huben na bise alkalde na sa paagi kan LODI dakol na mga residentes digdi  urog na an mga tikapo sa buhay an nahihinggeanan sa saindang pangangaipo nin remedio legal. 

Manonotaran na an  Sanggunuang Bayan sa pamamayo ni Pan  an sustenido sa pakikisumaro sa oficina kan ehecutivo local dapit sa  mga programa, advocacia asin actividad kan local na gobyerno para sa karahayan kan kagabsan. 

Nagkakapirang significanteng naginibohan lehislatura iyo an paghaman nin mga ordinansa asin documentos para sa pag-extendir nin license to operate sa Goa Community College gikan sa Commission on Higher Education (CHED).

Ini an kaipohan tanganing an fundo para sa operasyon kan escuelahan maggikan na mismo sa CHED imbis sa local na gobyerno. Dagdag pa iyo an kaipohan na  ordinansa para sa license to operate  kan  Department of Health para sa Goa Municipal Infirmary. 

Sa paagi man kan Sangguniang Bayan nahimo asin padagos na pig-aadalan  an Local Traffic Code na mahalagang gayo sa sarong mauswag na banwa arog kan Goa.

Mientrastanto, pigbuyagyag kan bise alkalde na kan  uminaging semana pa sana  iguang labing tres cientos na mga Goaeño an nakatapos nin short term courses sa Goa Skills Training and Assessment Center (GSTAC) sa pakikipagtabangan sa TESDA.

An GCC asin GSTAC parehong itinugdas ni defuntong Alkalde Marcel S. Pan, ama kan huben na Pan. 

Apwera sa nagunong certificate, an mga gradwado an nakarecebi pa nin cash allowance gikan sa ahencia. Sinda an tinatabangan man na makalaog sa empleo mantang an TESDA iguang mga partner companies na handang mag-acomodar nin mga bagong aplicante sa trabaho.

Naglalaom si Pan na sa tamang pagkasararo entre  kan Sangguniang Bayan asin oficina ni Alkaldesa Raquel S. Lim pating suporta kan mga Goaeño padagos na magantad an banwaan.