LRay naglinaw dai nagcocontra sa STL

Piglinaw ni Representante LRay Villafuerte kan segundo distrito kan Camarines Sur na dai sinda nagcocontra sa Small Town Lottery (STL) envez ribayan an Evenchance Gaming Corporation huli kan mga pagbalga sa Revised Implementing Rules and Regulations (RIRR) na nag-gogobernador sa pagpadalagan kan negosyo.

Ini an saindang paglinaw sa mga taga Camarines Sur sa tahaw kan kahurotan ninda sa Philippine Charity Sweeptakes (PCSO) main office na dapat cancelaron an franquicia kan Evenchance huli kan pagbalga kan mga pinapasunod sa RIRR.

Si LRay kaibahan sinda Representante Migz Villafuerte kan ika-limang distrito, Representante Anthony Tsuyoshi Horibata kan premir distrito asin Bicol Saro party list Rep. Brian Raymund Yamsuan naghurot sa PCSO na halion an Evenchance digdi sa provincia huli kan mga minasunod na pagbalga, siring kan pagpalyar sa tamang panahon kan remiso sa PCSO, dai naka-uniforme an mga kolector na mayo pa nin ID, ginigibong front kan jueteng an negosyo asin pagpataya sa menor de edad.

An mga pahayag na ini kan representante kan segundo piglinaw sa entrevista kan BBS-FM Naga.

Alagad sa pinadarang kasimbagan kan Evenchance sa PSCO main office napag-araman na saindang pinapahimotikan an mga sahot mantang nagkukumple sinda sa RIRR.

An franquicia kan Evenchance sa Camarines Sur magin sa iba pang rehiyon nakatalaan magpaso na sa Febrero 29, 2024 hinuhurot kan apat na representante na dapat i-black list kan PCSO.