LRAY NANINDUGAN SA KUMPETISYON: Casureco III tubod sa‘‘take over’’ kan BLPC

Kun aaprubaran kan congreso an franquicia para sa Bicol Light and Power Corporation (BLPC), malinaw na pagbalga sa Acta Republica No. 9136 na mas midmid sa Electric Power Industry Reform Act of 2001 (EPIRA Law), na tinatawan nin 50 anyos na franqucia na igwa pang siyam na taon na ‘‘full term guarantee’’ asin RA 6038 o may exclusibong franquicia na mag-operate nin distribution system an Camarines Sur III Electric Cooperative (Casureco III) sa Rinconada area.

Dai tiwala an Casureco III na kumpetisyon an katuyohan kan HB 1084 alagad mahuhulog man giraray sa ‘‘take over’’.

Ini an mga pahayag sa Bicol Mail ni Casureco III Director Welbur Almoneda mala ngani igwa na sindang resolusyon asin iba pang sektor na minasuporta kan saindang panindugan kontra sa BLPC na sainda nang sinumiter an mga position papers ki Senate President Migz Zubiri maging kaparejong mga manifesto ki House Speaker Martin Romualdez kan Camara-Baja.

Kabali sa grupo na nagkokontra sa pagtao nin franquicia sa BLPC iyo an Bicol Electric Cooperative Association, Bicol Association of Institutional Managers, League of Electric Cooperatives Information and Communication Officers, National Association of General Manager of Electric Cooperatives, Bicol Chapter, mga empleados kan cooperativa saka igwa pang masunod na grupo kontra sa BLPC.

LABANAN. Mga opisyales asin empleados kan Casureco III sa Ciudad nin Iriga padagos kan saindang Black Friday Protest kontra sa Bicol Light and Power Corporation. (Casureco 3 FB page)

Huli kaini liwat nabuhay sa Casureco III asin iba pang organisasyon sa Rinconada area nganing ipaabot sa 19th Congress an saindang pusog na panindugan kontra sa posibleng pagpasar kan House Bill No. 1084 na pig-introducer ninda Congresista LRay Villafuerte, Congresista Migz Villafuerte asin Congresista Tsuyoshi Anthony Horibata asin Congresista Nicolas Enciso VIII na tawan nin franquicia an Bicol Light and Power Corporation na mag-operate nin ‘‘electric power’’ para sa katuyohan komersiyal.

Sinabi pa ni Almoneda na dai sinda tubod sa paliwanag ni Congresista LRay Villafuerte na kumpetisyon an katuyohan kan BLPC alagad katapos-taposi ‘‘take over’’ sa cooperativa nin electricidad sa Rinconada area.

An HB No. 1084 ika-apat nang veces nagprubar na ipalusot sa congreso alagad risado na nagsasakay sana ngunian sa isyu sa pagparalangkaw kan singil sa tarifa sa kuryente na haros an mga ECs apektado sa halangkaw na presyo kan kuryente na pinapabakal kan mga power supplier sa rason nagparalangkaw man an inaangkat na oring asin nagparalangkaw pa an presyo kan petrolyo, sabi pa kan director.

An halangkaw na tarifa kan mga ECs temporayo sana man na puedeng magbalik sa dating tarifa.

An isyu sa ailing electric cooperative, harayo na sa presenting kamugtakan sa ngunian na Triple A na an Casureco III na iyo na an pinakalangkaw na kategorya kan NEA sa mga nag-aasenso nang cooperativa nin electricidad.

Ta’no ta bubugtakan kan pigsasabi nindang kumpetisyon alagad mahuhulog man giraray sa ‘‘take over’’sabi pa ni Almoneda.

Sa lado kan proponente kan House Bill 1084 parte kan FB Post ni Congresista LRay, ‘‘Since 2016 an solusyon namin na ini-offer ay magkaruon na Tayo ng choice! Dapat meron ibang kumpanya na Pwede i-consider pagpilian na hinde Lang Casureco. Ngayon monopoly ng Casureco ang pag supply ng kuryente! Wala tayo choice! Dapat magkaruon ng tunay na competition!’’

An solusyon naman para magkaruon ng choice hinde monopoly , para magkaruon ng Mas mababa at efficient power supply and no brownout ay ma approve na ang Bicol Light and Power na franchise sa Rinconada at isunod sa iba.”

Sa saindang HB No. 1084 ‘‘An act granting the Bicol Light and Power Corporation a franchise to construct, install, establish, operate, own, manage and maintain a power distribution system for the conveyance of electric power to the end users in the towns of Baao, Balatan, Bato, Buhi, Bula, Nabua and the City of Iriga, province of Camarines Sur, and for other purposes’’. (dpa)