top of page

LTFRB, LTO nagpatanid vs kolorum na PUVs

Ciudad nin Legazpi --- Nagpatanid an LTFRB asin LTO sa nawawalat pang quince por ciento kan mga public utility vehicles (PUVs) sa Bicol na magpasiring na sa Land Transportation Franchising and Regulatory Board (LTFRB) nganing magpa-consolidate sundo sa Abril 30, 2024 asin dai ideclarang kolorum an saindang jeepney.


Si Joel Defeo, Regional Director kan LTFRB nagsabi sa ngunian igua nang 85 por ciento kan PUVs sa Bicol nasa listahan kan saindang opisina rehiyonal na nagpa consolidate na para sa PUV Modernization Program (PUVMP) alagad nagpatanid sa mga operator kun padagos na magsisinutil idedeclarang kolorum an PUVs na magpalyar maghabol sa huring aldaw nganing magpa consolidate.


Nagtutubod an ahencia na nagpalyar si planong ‘tigil pasada’ sa Bicol kan Abril 15, 2024 mientras na nasa 85 por ciento kan PUVs nagpa rehistro na bilang mga PUVMP.


Bukas an opisina kan LTFRB dawa aldaw nin Sabado nganing recibihon an mga aplicante sa PUVMP.


An LTFRB asin LTO nagpatanid sa mga operator kan PUVs na kun masinutil na magpa consolidate saindang dadarakopon an PUVs na declarado nang kolorum mantang considerado nang hinobaan na sinda nin franquicia kan gobierno.


An duwang ahencia igwa nang coordinasyon sa Philippine National Police nganing darakopon an kolorum na PUVs.


Si Presidente Ferdinand Marcos Jr. na mismo an nagdeclara na sarado na an tinaong plaso hasta kan Abril 30, 2024.


Comments


bottom of page