LTFRB sinisingil na sa “Libreng sakay”

Tolong bulan na alagad sagcod ngunian dai pa nababayadan kan Land Transportation Franchising and Regulatory Board (LTFRB) an maabot sa sangatos na mga operator/driver kan public utility jeepney asin van na nag-aprubetsar kan Service Contracting Program kan ahencia nganing matabangan an sektor nin transporte na apektado kan pandemya.


An programa inaapod na ‘‘Libreng Sakay Para sa APOR’’, an ibang mga jeepney operator nin huli kan pagtios ngunian na pandemya ‘‘nagsamantala’’ sa ‘‘2nd phase program’’dawa abala an pagbayad kan LTFRB mantang maluya an kayod aroaldaw mientras na mayong face-to-face classes sa pribado asin publikong escuelahan.


Sa paliwanag ni dating BGen. asin ngunian Director Antonio Gardiola kan LTFRB Bicol halabaon an mga rekisitos asin accounting process na inaagihan sa saindang opisina sentral lalo na sa Department of Budget and Management nganing ipaluwas an mga obligasyon sa mga operator/driver.


An problemang ini ‘‘nationwide’’ bako lang digdi sa Bicol, sabi pa ni Gardiola.


An ‘‘libreng sakay’’ igwang nakatagamang fondo an gobierno nasyonal na nagcacantidad nin P3.3 bilyon sa General Appropriation Act of 2021.


Kan nakaaging semana an second phase piglansar sa Bicol, sa sinambit na programa an mga tsuper babayadan base sa pigplano kan pagbayad kan ahencia na nagkumperme an saindang operators.


An tsuper pinangakoan na babayadan cada semana sa kasundoan na kilometrahe kan viaje sa laog kan pigtaong peryodo asin makakarecibe man nin cinco mil pesos na boarding incentive para sa benipisyaryo.


Dai paman piglinaw kun pera an nakatagamang fondo sa provincia mantang igwa pang ibang nasa proceso na an saindang registration kan transport cooperative.


An calificado sana sa programang ini kan ahencia si mga rehistradong cooperativa sa Cooperative Development Authority. (dpa)