LTO Bicol igua nang bagong reg’l director

Igua nang bagong pamayo an Land Transportation Office (LTO) Bicol na nag-asumir na sa posisyon poon kan Mayo 2, 2025.

Si Edgar Castillijos, iyo na an bagong regional director karibay ni Director Francisco Rances na nadestino sa Cordillera Administrative Region (CAR) matapos kan saiyang limang taon na serbisyo sa rehiyon cinco.

An bagong jefe kan LTO nagsabi na magiging silag an saiyang pagpadalagan kan ahencia sagcod na maimplementar nin bagong inobasyon mantang si mga marhay na programa ni Rances saiyang ipapadagos.

An saiyang Assistant Regional Director Vincent Nato, an executive committee, mga jefe kan district offices magiging katuwang nganing maseguro an mandato sa pagserbe sa mga Bicolano.

Ipapadagos niya an kampanya sa mga nagmamanijo nin mga vehiculos na maglikay sa road rage sa tahaw kan naglangkaw an mga insidente sa tinampo ngunian na bulan nin Mayo 2025.

Saiyang pinapagirum na an driver’s license bagong privilejo na huli ta ini puedeng ma-revoked o masuspende kun mga nagpapasaway sa tinampo.

An pagdisciplina sa mga tsuper nganing maseguro an road safety para sa mga pasajeros maging pribadong sasakyan. An ahencia igua nang mga binawian nin licencia sa pagmanijo huli sa mga pagpasaway asin nagpositibo sa ilegal na droga.

Ipapadagos man kan bagong jefe kan ahencia an mga surprisang drug testing sa mga tsuper sa terminal mantang dakul nang mga caso na igua nang chofer naggagamit nin ilegal na droga matapos magpositibo sa droga.