LTO District Office pinakandadohan

Bilang suporta kan Land Transportation Office (LTO) Bicol sa paglaban kan lokal na gobierno kan Ciudad nin Naga contra sa paglangkaw kan caso sa coronavirus disease, pinagmarhay na suspendiron an transaksyon kan Naga LTO District Office puon Hunyo 16-30.

Si LTO regional director Francisco Ranches nagpaluwas nin direktiva sa Naga LTO District Office na sarahan muna an opisina sa laog kan panahon na yaon pa sa irarum kan Modified Enhanced Community Quarantine (MECQ) an ciudad.

An Naga LTO saro sa mga pigpipilahan kan ginatos na mga makua nin driver’s license asin renewal sa mga car registration na inaabot nin maghapon an mga kliyente.

Huli kaini, sinabi ni Ranches mantang halaba an listahan kan mga guidelines kan IATF na iimplementar sa irarum kan MECQ nganing mahale an dakul na mga pagtitiripon kan mga may transaksyon sa district office dapat suspendiron muna sa laog nin duwang semana.

Si mga ending sa number 6 kan plate number nin mga vehiculo ngunian na bulan pinag-eextendir sagcod sa bulan nin Agosto 2021 na mayong iimponer na multa.

Alagad bukas man an LTO District Office sa Pamplona, Camarines Sur si mawot na digdi na mag-renew kan saindang car registration asin driver’s license nganing dai na maghalat kan masunod na bulan, sabi pa kan LTO Bicol.

Igwa nang direktiva sa mga LTO law enforcer asin deputized agent kan ahencia na dai muna dakupon an mga may kapot kan driver’s license na nagpaso na ngunian na Hunyo 2021. (dpa)