top of page

LTO Pili EO pigdadayo na nin ginatos na kliyente

Pigdadayo na nin ginatos na kliyente an extension office Land Transportation Office (LTO) sa Pili, Camarines Sur huli ta igua nang dagdag na mga services siring kan LTO District Office sa Ciudad nin Naga.


Si Frederick C. Torrecampo, OIC kan LTO Pili Extension Office nagsabi na nagdadakul an saindang kliyente huli kan pagkakaigua digdi kan pinakaenot na LTO Drive-Thru Registration Renewal sa rehiyon.


Si mga may transaksyon bako lang hale sa pagtaraid na banwaan envez hali pa sa Partido area mientras na an saindang mga services kinababalehan kan mga minasunod; 1. Renewal of moter vehicle registration 2. Student permit application 3. New non prof license 4. Add DL code/s 5. Change class (from non from prof to prof) 6. Renewal of drivers license expired more than 2 years (dormant) 7. License renewal, duplicate, advance renewal and revision o records asin 8. Free theoretical driving course.


Katuyohan na bugtakan nin extension office kan LTO sa Ciudad nin Naga nganing dai na madificilan si hale sa ibang mga banwaan na dai na magpasiring sa ciudad envez harani na an Pili Extension Office.


Bago asin mahiwas an LTO Pili EO na inaguraran kan nakaaging bulan na naging juespe de honor sinda Cyril D. Velasco, Presidente kan NH Holdings Corp. asin representante kan Key2 Private Motor Vehicle Inspection, na bilog an suporta ninda sa pagkaigua nin bagong facilidad nganing madara an serbisyo kan ahencia nganing maparani sa publico.


Hinahalat nalang na maaprubaran sa senado an bill nganing maging District Office kan LTO sa kabesira kan provincia nin Camarines Sur matapos enot nang maaprubaran sa Camara-Baja kan Febrero 2024 an House Bill 6712 na pinapadrenohan ni Camarines Sur 3rd District Representative Gabriel H. Bordado Jr.


An HB 6712 ‘'An act creating a regular LTO District Office in the municipality of Pili, Camarines Sur to be known as the LTO Licensing Center of Pili, Camarines Sur, appropriating funds therefor and for other purposes’’.


Sa ngunian afuera sa pinaenot na LTO District Office sa Ciudad nin Naga nagkaigua na sa Pamplona, Ragay, Ciudad nin Iriga asin an Partido District Office sa Tigaon, CamSur.

Comments


bottom of page