LTO SA PILI, CSUR SARO NANG REGULAR NA DISTRICT OFFICE: HB 6712 ni Bordado pirmado na ni PBBM

Inaprubaran na ni Presidente Ferdinand R. Marcos Jr. an House Bill 6712 ni Camarines Sur 3rd district Congressman Gabriel H. Bordado Jr. para sa kombersiyon kan Land Transportation Office (LTO) extension office sa Pili, Camarines Sur nganing maging regular na LTO District Office.

Si Bordado, na vice mayoralty candidate sa Ciudad nin Naga sa midterm elections sa Mayo 12, 2025 nagsabi na an saiyang pigpadrenohan na bill inaprubaran ni Presidente Marcos kan Abril 11, 2025.

An orihinal na HB 6712 ni Bordado kan isakat sa Senado saro nang Senate House Bill 9561 asin naaprubaran sa 3rd and final reading sa senado antes mag-recess an sesyon kan Deciembre 2024.

Saro nang Republic Act No. 121641 ‘‘An Act Converting Existing LTO extension office in the Municipality of Pili, Province of Camarines Sur into Regular District Office and Appropriating Funds Therefore.''

An ley magiging epektibo pakatapos nin kinse diyas na ipublicar sa Official Gazette o sa peryodico nasyonal.

Si Eric Torrecampo, jefe kan sinambit na opisina nagpahayag nin pasasalamat nganing mabawasan an transakyon sa LTO District Office sa Naga envez si mga taga Kabesira kan provincia dai na magastos maging si hale pa sa ibang municipalidades madereto na sa saindang opisina.

Sinabi ni Torrecampo na nagkaulay na sinda ni Rep. Bordado para sa gigibohon na formal na pagbubukas kan saindang opisina bilang regular LTO District Office alagad pigtalaan pakatapos na kan midterm elections.

An LTO DO sa Ciudad nin Naga nagpahayag man nin pasasalamat huli ta manipis na an maghapon na nagpipila sa saindang opisina mantang pacil naman sa pagtaraid na banwaan kan Pili huli ta harani na sa saindang banwaan.

LTO PILI