LUKARET!

Tigsik ko po kamong mga taga Naga

Dae magreklamo sa hamot kan basura

Dae mahayblad; saindo pong idedma

Ta kamo nakikiparong man sana!

Tigsik ko an Madi kong taga Santa Cruz

Iguang TUPAD, AKAP, igua pang 4Ps, ayos!

Kawasa ini matinubod saka super boot

Madi, koahon ka naman lugod ni Lord!

Tigsik ko man si Lando Bicolano

An hangaw biyong nagkakalayo

Kun minaradas an super bagyo

Pigtatamongan an siling rimurimo!

Tigsik ko an harong kan salampati

Piglagarto kan bagyong uminagi

Dae natumba, dae naremate

Apesar na sarusaro an harigi!

Tigsik ko man an harong kan baoo

Dawa magsaen pirming lutoloto

Kun sa daga super atrasado

Sa dagat, marikas garong piglalapag kan Diablo!

Tigsik ko an nagbebesibesihan na Lukaret

Iguang lapang ugaling sa pusit

Kun naiipit, dae na makahirit

Maitom na tinta pinapakupsit!