Lupi Super Health Center nakatiwang-wang sana-Señar

NaNghihinayanG si Vocal Waren Señar kan premir distrito kan Camarines Sur sa pinatugdok na Super Health Center sa Lupi, Camarines Sur na nakatiwang-wang sana alagad dai man nagagamit.

Natutuyawan kan vocal an Department of Health (DOH), huli ta naggastos nin milyones pesos an ahencia alagad dai man tinagamahan nin fondo na cantidad P50-M nganing maging operational.

Dai man kaya kan sadiring fondo kan LGU huli ta igua sana sinda nin P214 -M na annual budget. Igua man kaparejong edificio sa Ragay, Camarines Sur alagad nakatiwang-wang, sabi pa ni Señar.

An edificio binasbasan kan Hunyo 30, 2025 sa administrasyon ni dating Alcalde Lilian Gagay Matamorosa.

Gagamiton an edificio para sa basic asin essential health services kan mga constituentes digdi para sa mga pasyente na nanga-ngaipo nin serbisyo sa salud.

Dakulang kaogmahan kuta na kan LGU alagad mayo man sinda nin sadiring fondo para sa sueldo kan doctor, nurses, asin iba man empleados maging mayo pang kagamitan.

Sagcod sa ngunian mayo man nin koneksyon sa kuryente asin tubig.

Dai pa maaraman kan vocal kan premir distrito kun nuarin tatagamahan nin fondo kan DOH nganing maging operational.

Super Health Center sa Lupi, Camarines Sur sagcod sana sa inagurasyon alagad dai man nagagamit.