Luzon nagkukulang na nin suplay karning orig

Pili, Camarines Sur --- Posibleng abuton pa nin tolong bulan antes makabangon an hog growers o mga paraataman nin orig asin negosyante kan karning hayop sa mga mercado huli ta inabut na nin panahon kan Pasko alagad padagos pang kulang an saindang suplay.

An problema sa suplay kan karne bako lang digdi sa rehiyon cinco envez sa bilog na Luzon asin dikit pa an nag-aataman o envuelto sa hog growers huli kan ASF.

Sa ngunian nasa 68 por ciento na sana an sufficiency level kan suplay nin orig sa Kabikolan epekto pa kan paglakop kan African Swine Fever (ASF) matapos abuton sa 17,209 na ataman na mga orig an ginaradan o pig-depopulate kan Department of Agriculture asin National Meat Inspection Service (NMIS) nganing maibitaran an marikas na paglaila kan virus sa hayop.

Si Emily Bordado, regional information officer kan DA Bicol nagsabi sa Bicol Mail na nag-abut sa 2,406 na mga paraoma an apektado sa rehiyon alagad nabayadan kan saindang ahencia nin total na Php52 milyon.

Kasuodmang Miercules, Deciembre 16 an enot na batch kan saindang natawan nin piglets iyo an mga paraoma sa Canaman, Camarines Sur asin ini si lugar na salbado na sa ASF nganing magpadagos kan saindang pag-ataman kan hayop.

Igwa pang masunod na mga municipalidad alagad defende sa mga barangay kun zero na sa caso sa ASF, sabi pa ni Bordado.

Sa laog nin tolong bulan dakula na an ataman na orig asin puede na ining bunoon alagad yaon na sa diskresyon kan paraoma kun sainda nang ipapabakal nganing makadagdag sa pagkulang-kulang nin karne sa mga mercado.

Huli kaini, kinakarkulo na sa laog nin tolong bulan luway-luway nang mabuelta sa normal an suplay kan karne sa mga mercado kaya ngani nagtatabang an ahencia na makadistribuer nin piglets.

VIAJERO NIN BUHAY NA ORIG DAPAT MAKONTROL KAN LGUs

Nangapudan pa an DA Bicol sa mga lokal na gobierno na magpasar nin ordinansa nganing makontrol an mga naglalaog na pakturador na nagbabakal nin orig sa manlaen-laen na banwaan nganing i-viaje sa Metro Manila asin sa iba pang provincia.

Saro sa naheling kan DA iyo an ginigibong pag-regulate kan LGU Tigaon, Camarines Sur kan mga viajero na naghahakot kan mga buhay na orig paluwas digdi sa Bicol.

Sa Camarines Sur unikong Partido district an zero sa caso sa African Swine Fever nababantayan pa an pagluwas kan hayop sa ibang provincia matapos kan estrictong pig-iimplementar sa saindang animal check point. (DPAureus)